रत्नागिरीच्या मालकासह वाहने ताब्यात, पाच जणांवर गुन्हा
रत्नागिरी:- कुडाळ तालुक्यातील पिंगुळी-गोंधळपूर मुस्लिमवाडी येथील मोकळ्या मैदानावर छुप्या पद्धतीने भरवण्यात आलेल्या बैलांच्या बेकायदेशीर झुंजीवर कुडाळ पोलिसांनी ६ नोव्हेंबर रोजी सकाळी ६.३० वाजण्याच्या सुमारास धाडसी कारवाई केली. आर्थिक लाभासाठी आणि जुगाराच्या उद्देशाने बैलांची अमानुष झुंज लावून प्राण्यांचा छळ सुरू असल्याची गोपनीय माहिती मिळताच पोलिसांनी घटनास्थळी धडक मारली. पोलिसांची चाहूल लागताच झुंज पाहण्यासाठी जमा झालेल्या गर्दीची एकच पळापळ झाली, मात्र पोलिसांनी तत्परता दाखवत मैदानावरील झुंज तत्काळ थांबवून सुमारे एक लाख रुपये किमतीचे दोन बैल ताब्यात घेतले.
या प्रकरणात बैलांची विनापरवाना बेकायदेशीर वाहतूक करणाऱ्या बोलेरो मॅक्स व पिकअप टेम्पो या वाहनांवर जप्ती आणण्यात आली असून, आयोजकासह रत्नागिरीतील एका बैलमालकावर आणि टेम्पो चालकांवर गुन्हा नोंदवण्यात आला आहे. सहाय्यक पोलीस फौजदार कोळेकर यांनी स्थानिक पोलीस पाटील शंकर सातार्डेकर यांच्या उपस्थितीत केलेल्या प्राथमिक चौकशीत या झुंजीचे आयोजन पिंगुळी येथील गुलाब अब्दुल लतीफ शेख याने केल्याचे उघड झाले. ताब्यात घेतलेल्या जनावरांमध्ये रत्नागिरी जिल्ह्यातील टेंबे खाडेवाडी येथील सुभाष मनोहर खाडे (वय ४७) यांच्या मालकीचा ५० हजार रुपये किमतीचा पांढऱ्या रंगाचा बैल आणि नेरूर-दुर्गवाड येथील मुन्ना मुजावर यांच्या मालकीचा ५० हजार रुपयांचा करड्या रंगाचा बैल यांचा समावेश आहे. हे दोन्ही बैल रत्नागिरी येथील टेम्पोचालक सर्वेश सुरेश भातडे व अन्य एका चालकाच्या संगनमताने वाहनांतून विनापरवाना मैदानावर आणण्यात आले होते.
बैलांना गंभीर दुखापत होण्याची दाट शक्यता असतानाही निव्वळ पैशांच्या हव्यासापोटी प्राण्यांचा छळ केल्याप्रकरणी कुडाळ पोलिसांनी प्राण्यांचा छळ प्रतिबंधक अधिनियम १९६० चे कलम ११(१)(m), ११(१)(n), महाराष्ट्र जुगार प्रतिबंधक अधिनियम १८८७ चे कलम १२(अ) आणि भारतीय न्याय संहिता २०२३ चे कलम ३(५) अन्वये एकूण पाच जणांविरुद्ध गुन्हा दाखल केला आहे. दोन्ही बैलांना सुरक्षिततेसाठी पोलीस ठाण्याच्या आवारात ठेवण्यात आले असून कुडाळ पोलीस या प्रकरणाचा पुढील कसून तपास करत आहेत.
