पाचल:- राजापूर शहरातील कोदवली साईनगर परिसरातून चोरीला गेलेल्या एका बुलेट मोटारसायकलचा अखेर छडा लागला असून, ती मलकापूर-कोकरूड मार्गालगतच्या एका गटारात बेवारस अवस्थेत आढळून आली आहे. चोरीनंतर पोलिसांनी तपास सुरू केल्याने आणि विशेषतः तीन चोरटे सीसीटीव्ही कॅमेऱ्यात कैद झाल्याने, त्यांच्यावर दबाव वाढला असावा आणि त्यामुळेच त्यांनी ही गाडी या ठिकाणी टाकून पळ काढला असावा, असा पोलिसांचा कयास आहे.
ही घटना शनिवारी पहाटे ४ वाजण्याच्या सुमारास घडली होती. कोदवली साईनगर येथील रहिवासी शमसुद्दीन अब्दुल्ला काझी (वय ६१) यांच्या घरासमोर लावलेली ही बुलेट चोरट्यांनी लंपास केली होती. चोरीची ही संपूर्ण घटना परिसरातील सीसीटीव्ही कॅमेऱ्यात कैद झाली होती, ज्यात तीन अज्ञात आरोपी स्पष्टपणे दिसत होते. या फुटेजच्या आधारे शमसुद्दीन काझी यांनी राजापूर पोलीस ठाण्यात तत्काळ तक्रार दाखल केली होती आणि पोलिसांनी या प्रकरणी तीन अज्ञात आरोपींविरुद्ध गुन्हा नोंदवला होता.
दरम्यान, या चोरीला गेलेल्या बुलेट मोटारसायकलची माहिती मलकापूर परिसरातून मिळाली. मलकापूर-कोकरूड मार्गाजवळ एका गटारात ही बुलेट बेवारस स्थितीत पडलेली असल्याची माहिती स्थानिक नागरिकांनी बुलेटचे मालक शमसुद्दीन काझी यांना दिली. काझी यांनी त्वरीत ही माहिती राजापूर पोलिसांना कळवली.
माहिती मिळताच, राजापूर पोलिसांनी कोणतीही वेळ न घालवता तातडीने एक पथक मलकापूरकडे चोरीला गेलेली बुलेट ताब्यात घेण्यासाठी रवाना केले आहे. सीसीटीव्ही फुटेजच्या माध्यमातून पोलिसांचा तपास जलद गतीने सुरू असल्याने चोरट्यांनी मोटारसायकल येथे टाकून देऊन पळ काढला असावा, असा अंदाज आहे. या प्रकरणाचा पुढील आणि सखोल तपास सहाय्यक पोलीस निरीक्षक सागर खंडागळे हे करत आहेत. बुलेट मिळाली असली तरी, सीसीटीव्ही फुटेजमध्ये कैद झालेल्या तिन्ही चोरट्यांच्या अटकेसाठी पोलीस युद्धपातळीवर प्रयत्न करत आहेत.
