रत्नागिरी:- उपविभागीय अधिकारी निलेश माईंनकर यांची पालघर येथे बदली झाल्यानंतर त्यांच्या रिक्त जागी आता भारतीय पोलीस सेवा अधिकारी आरंशा यादव यांनी अधिकृतपणे रत्नागिरी उपविभागीय पोलीस अधिकारी पदाचा कार्यभार स्विकारला आहे.
मागील कार्यकाळात श्री. निलेश माईंनकर यांनी आपल्या पदाची धुरा सांभाळत असताना प्रशासकीय कामकाजात आणि कायदा व सुव्यवस्था राखण्यात अनेक महत्त्वाची कामे यशस्वीपणे पार पाडली होती. आता त्यांची पालघर येथे बदली झाल्यामुळे त्यांच्याकडे नवीन प्रशासकीय व शासकीय जबाबदाऱ्या सोपवण्यात आल्या आहेत. त्यांच्या जागेवर पदभार स्वीकारलेल्या आरंशा यादव या २०२३ बॅचच्या अत्यंत होतकरू आणि धडाडीच्या आयपीएस अधिकारी आहेत. त्यांनी युपीएससी सिव्हिल सर्व्हिसेस परीक्षा २०२२ मध्ये संपूर्ण देशात २०१ वा रँक मिळवून उज्ज्वल यश संपादन केले होते. मूळच्या हरियाणा राज्यातील असलेल्या आरंशा यादव यांनी दिल्लीच्या प्रतिष्ठित स्टीफन्स कॉलेजमधून इंग्रजी ऑनर्स पदवी पूर्ण केली आहे, तसेच जवाहरलाल नेहरू युनिव्हर्सिटीमधून आंतरराष्ट्रीय संबंध या विषयात आपले पोस्ट-ग्रॅजुएशन पूर्ण केले आहे. सुरुवातीला त्यांची निवड गुजरात केडरसाठी झाली होती, विवाह झाल्यामुळे त्यांची बदली महाराष्ट्र केडरमध्ये करण्यात आली असून, त्या सध्या महाराष्ट्रात कोल्हापूर येथे अपर पोलीस अधीक्षक म्हणून कार्यरत होत्या.
रत्नागिरी उपविभागीय पोलीस अधिकारी पदाचा कार्यभार स्वीकारल्यानंतर आरंशा यादव यांच्या आगमनाने या विभागातील पोलीस प्रशासकीय कामे, कायदा व सुव्यवस्था तसेच गुन्हेगारी नियंत्रणाच्या कामांना अधिक गती आणि धार मिळणार आहे. सर्वसामान्य नागरिकांच्या अडीअडचणी वेळेत सोडवण्यासाठी, महिला व बालकांची सुरक्षा सुनिश्चित करण्यासाठी आणि पोलीस दलात अधिक पारदर्शकता कायम राखण्यासाठी अशा तरुण व उच्चशिक्षित अधिकाऱ्यांची नियुक्ती अत्यंत महत्त्वाची ठरू शकते. या नव्या बदलांमुळे स्थानिक पातळीवरील विविध कायदा व सुव्यवस्थेच्या प्रश्नांना प्रभावीपणे तोंड देण्यास मदत होईल असा विश्वास नागरिकांकडून व्यक्त केला जात आहे.
