राजापूर:- मुंबई-गोवा महामार्गावर ओणी नजीकच्या गगनगिरी महाराज आश्रमाजवळ भरधाव वेगाने जाणाऱ्या एका मद्यधुंद स्विफ्ट कारचालकाने पुढे जाणाऱ्या दुचाकीला पाठीमागून भीषण धडक दिली. या अपघातात दुचाकीस्वार रस्त्याच्या कडेला फेकला गेल्याने गंभीर जखमी झाला, तर दुचाकी सुमारे १५ ते २० मीटर फरफटत जाऊन कारच्या बोनेटखाली चिरडली गेली. या प्रकरणी राजापूर पोलिसांनी कारचालकाविरोधात भारतीय न्याय संहितेसह मोटार वाहन कायद्याच्या विविध कलमांन्वये गुन्हा नोंदवला आहे.
रत्नागिरी तालुक्यातील चिंचखरी येथील रहिवासी शुभम आत्माराम बोरकर (वय २७) हे स्टेट बँक ऑफ इंडियाच्या होमलोन विभागात कार्यरत आहेत. गुरुवारी, ८ ऑक्टोबर रोजी बँकेच्या कामकाजानिमित्त ते आपल्या ॲक्टिव्हा दुचाकीने (क्र. एम.एच. ०८ ए.एम. ४२२४) राजापूर शाखेतील काम आटोपून लांजा शाखेकडे निघाले होते. दुपारी तीन वाजण्याच्या सुमारास मुंबई-गोवा महामार्गाने जात असताना खरवते गावच्या हद्दीत गोव्याकडून भरधाव वेगात आलेल्या लाल रंगाच्या स्विफ्ट कारने (क्र. एम.एच. ०८ बी.ई. ३४६९) त्यांच्या दुचाकीला पाठीमागून जोरदार धडक दिली. ही धडक इतकी भीषण होती की शुभम बोरकर हे उडून रस्त्याच्या बाजूला गवतात पडले, तर स्विफ्ट कारचालकाने दुचाकीला सुमारे १५ ते २० मीटर फरफटत नेत महामार्गाच्या डाव्या बाजूला असलेल्या संरक्षक भिंतीवर नेऊन आदळले. यात दुचाकी कारच्या पुढील भागाखाली अडकून अक्षरशः चेपली गेली.
अपघातानंतर महामार्गावरून जाणाऱ्या प्रवाशांनी आणि स्थानिक नागरिक प्रज्योत खानविलकर यांनी तत्काळ घटनास्थळी धाव घेत जखमी बोरकर यांना सावरले. नागरिकांनी कारचालकाला वाहनातून बाहेर काढले असता तो दारूच्या नशेत धुंद असल्याचे आणि त्याला धड बोलताही येत नसल्याचे स्पष्ट झाले. आर्यन किशोर ढबले (वय २४, रा. वॉर्ड नं. १, वायफड, जि. वर्धा) असे या संशयित कारचालकाचे नाव असून त्याने ही कार रत्नागिरी येथून भाड्याने घेतल्याची माहिती समोर आली आहे.
घटनेची माहिती मिळताच पोलिसांनी घटनास्थळी धाव घेतली. जखमी शुभम बोरकर यांना तातडीने राजापूर येथील जोशी रुग्णालयात उपचारासाठी दाखल करण्यात आले. पोलिसांनी ताब्यात घेतलेल्या संशयित चालक आर्यन ढबले याची ब्रेथ ॲनालायझर मशिनद्वारे तपासणी केली असता, त्याचा अहवाल पॉझिटिव्ह आला. त्यानंतर त्याला पुढील वैद्यकीय तपासणीसाठी राजापूर ग्रामीण रुग्णालयात पाठवण्यात आले. या प्रकरणी शुभम बोरकर यांच्या फिर्यादीवरून राजापूर पोलीस ठाण्यात गुन्हा नोंद क्रमांक २६६/२०२६ नुसार भारतीय न्याय संहिता २०२३ चे कलम २८१, १२५ (अ) आणि मोटार वाहन कायदा कलम १८४, १८५ अन्वये गुन्हा दाखल करण्यात आला असून राजापूर पोलीस पुढील तपास करत आहेत.
