रत्नागिरी:- कुवारबाव बाजारपेठ परिसरात खुलेआम सुरू असलेल्या ‘मुंबई बाजार’ नावाच्या मटका जुगाराच्या अड्ड्यावर रत्नागिरी शहर पोलिसांनी छापा टाकला. या कारवाईत पोलिसांनी एका आरोपीला ताब्यात घेऊन जुगाराचे साहित्य आणि रोख रक्कम जप्त केली आहे.
पोलिसांनी दिलेल्या माहितीनुसार, बुधवार, दिनांक ८ ऑक्टोबर २०२५ रोजी सायंकाळी ६ वाजून ५३ मिनिटांनी कवारबाव बाजारपेठेत, हेळेकर मिठाई दुकानाच्या बाजूला असलेल्या एका गल्लीत उघड्या जागेत जुगार सुरू असल्याची माहिती शहर पोलिसांना मिळाली.
त्यानुसार, रत्नागिरी शहर पोलीस ठाण्यात कार्यरत असलेले पोलीस हवालदार महेंद्र काशिनाथ खापरे (वय ४०) यांनी आपल्या पथकासह सदर ठिकाणी छापा टाकला.
या छाप्यादरम्यान, अशिष पांडुरंग कांबळे (वय ४९, रा. आदर्शनगर, पाडावेवाडी, मिरजोळे) हा इसम गैरकायदा आणि बिगर परवाना पद्धतीने ‘मुंबई बाजार’ नावाचा मटका जुगाराचा खेळ खेळवताना आढळून आला.
पोलिसांनी तात्काळ आरोपीला ताब्यात घेतले आणि त्याच्याकडून २,८९० रुपये रोख रक्कम आणि जुगाराचे साहित्य जप्त केले. आरोपी स्वतःच्या आर्थिक फायद्यासाठी हा जुगार खेळवत असल्याचे निष्पन्न झाले आहे.
पोलीस हवालदार खापरे यांच्या तक्रारीवरून, गुरुवारी ९ ऑक्टोबर २०२५ रोजी पहाटे २ वाजून २० मिनिटांनी रत्नागिरी शहर पोलीस ठाण्यात गु.आर.क्र. ४०१/२०२५ अन्वये महाराष्ट्र जुगार कायदा, १८८७ च्या कलम १२(अ) नुसार गुन्हा दाखल करण्यात आला आहे.
शहराच्या मध्यवर्ती ठिकाणी अशा प्रकारे जुगार सुरू असल्यामुळे परिसरातील नागरिकांकडून चिंता व्यक्त होत आहे, तर पोलिसांनी केलेल्या या कारवाईचे कौतुक होत आहे. शहर पोलीस या प्रकरणाचा अधिक तपास करत आहेत.
