लांजा:-कणकवली येथील 56 वर्षीय वृद्धाला बिबट्याच्या कातडीसह ताब्यात घेण्यात आले आहे. स्थानिक गुन्हा अन्वेषण विभाग आणि लांजा पोलीस स्थानक यांनी कुवे गणपती मंदिर येथे ही कारवाई केली.
पोलिसांनी दिलेल्या माहितीनुसार, मंगळवारी स्थानिक गुन्हा अन्वेषण विभाग रत्नागिरी पथक मुंबई-गोवा महामार्गावर सायंकाळी ४ ते ५ यावेळेत गस्त घालत होते. सायंकाळी ४.३० वा. दरम्याने कुवे गणपती मंदिर येथील हॉटेल आर्याप्रसाद समोर असताना सिंधुदुर्गकडून रत्नागिरीच्या दिशेने घेवून जाणारे चालक विद्याधर प्रभाकर भिडे (वय – ५६ रा. कणकवली) हे आपल्या ताब्यातील ओमणी क्र. ( एम. एच. 07 ए. जी. 0513) हे कुवे गणपती मंदिर येथे आले असता पोलिसांनी त्यांची गाडी थांबवून चौकशी करत असताना संशय आला. गाडीची तपासणी केली असता गाडीच्या सिटच्या खाली बिबट्याचे कातडी आढळून आली.
गुन्हा अन्वेषण विभाग व लांजा पोलीस निरिक्षक दादासाहेब घुटुकडे याच्यासह लांजा पोलीस पथक यांनी घटनास्थळाचा पंचनामा केला. रात्री विद्याधर भिडे याच्यावर गुन्हा दाखल करण्यात आला असून अधिक तपास पोलीस उपनिरीक्षक प्रशांत जाधव हे करीत आहेत.
