रत्नागिरी:- रत्नागिरी शहरात माणुसकीला काळीमा फासणारी एक संतापजनक घटना समोर आली आहे. खर्चासाठी मागितलेले पैसे दिले नाहीत या रागातून एका २१ वर्षीय मुलाने आपल्या वडिलांना शिवीगाळ करत धक्काबुक्की केली. या झटापटीत वडील पडक्या इमारतीच्या दुसऱ्या मजल्यावरून खाली पडल्याने गंभीर जखमी झाले आहेत. याप्रकरणी रत्नागिरी शहर पोलीस ठाण्यात मुलावर गुन्हा दाखल करण्यात आला आहे.
मिळालेल्या माहितीनुसार, फिर्यादी मनोज प्रभाकर सणस (वय ५३, रा. वाई, सातारा, सध्या रा. कुवारबांव) हे कुकिंगचा व्यवसाय करतात. २५ एप्रिल २०२६ रोजी सायंकाळी ५ वाजेच्या सुमारास मनोज सणस आणि त्यांचा मुलगा प्रणय सणस हे कुवारबांव येथील संगम हॉटेलच्या मागील एका पडक्या इमारतीच्या दुसऱ्या मजल्यावर बसले होते.
यावेळी आरोपी मुलगा प्रणय याने वडिलांकडे खर्चासाठी २००० रुपयांची मागणी केली. वडिलांनी “माझ्याकडे एवढे पैसे नाहीत, मी फक्त २०० रुपये देऊ शकतो” असे सांगितले. आपल्या मागणीपेक्षा कमी पैसे मिळत असल्याचा राग आल्याने प्रणयचा संयम सुटला.
पैसे देण्यास नकार दिल्याने आरोपी प्रणयने वडिलांना अर्वाच्च भाषेत शिवीगाळ करण्यास सुरुवात केली आणि तो त्यांच्या अंगावर धावून गेला. त्याने केलेल्या धक्काबुक्कीमुळे मनोज सणस यांचा तोल गेला आणि ते पडक्या इमारतीच्या दुसऱ्या मजल्यावरून थेट जमिनीवर पडले. या भीषण अपघातात त्यांच्या शरिराला गंभीर दुखापत झाली.
दुसऱ्या मजल्यावरून पडल्यानंतर जखमी मनोज सणस रात्रभर तिथेच पडून होते. दुसऱ्या दिवशी, २६ एप्रिल रोजी त्यांनी आपले मित्र दीपक घाटगे यांना बोलावून घेतले. त्यानंतर १०८ रुग्णवाहिकेच्या मदतीने त्यांना तातडीने जिल्हा शासकीय रुग्णालय (सिव्हील हॉस्पिटल), रत्नागिरी येथे दाखल करण्यात आले. सध्या त्यांच्यावर रुग्णालयात उपचार सुरू आहेत.
