रिंगणे कोंड येथे बोलेरो पिकअप गाडीसह २ लाख ८० हजारांचा मुद्देमाल जप्त
लांजा:- बेकायदेशीरपणे गुरांची वाहतूक करणारी बोलेरो पिकअप गाडी शिव प्रतिष्ठान हिंदुस्तान लांजाच्या कार्यकर्त्यांनी पकडून लांजा पोलिसांच्या ताब्यात दिली.ही घटना व्हेळ फाटा ते पाचलकडे जाणाऱ्या रोडवर रिंगणे कोंड या ठिकाणी घडली आहे. शुक्रवारी १७ जानेवारी रोजी दुपारी २.४५ वाजता घडलेल्या या घटनेत वापरण्यात आलेली गाडी व बैल असा एकूण २ लाख ८० हजार रुपयांचा मुद्देमाल पोलिसांनी ताब्यात घेतला असून राजापूर तालुक्यातील दोघांवर कारवाई करण्यात आली आहे.
याबाबत पोलिसांनी दिलेल्या माहितीनुसार व्हेळ ते पाचल रोडवर बेकायदा व विनापरवाना गुरांची वाहतूक होत असल्याची माहिती शिवप्रतिष्ठान हिंदुस्थान संघटनेच्या कार्यकर्त्यांना मिळाली होती. त्यानुसार काल शुक्रवारी दुपारी सापळा रचण्यात आला होता. दुपारी २.४५ वाजण्याच्या दरम्याने व्हेळ फाटा ते पाचलकडे जाणाऱ्या रोडवर रिंगणे कोंड या ठिकाणी बोलेरो पिकप गाडी क्रमांक (एम एच ०६ बी जी २८०१) गाडी थांबवण्यात आली असता या गाडीचा पाठीमागील हौद्यात दोन बैलांना दाटीवाटीने बांधून व चारापाण्याची व्यवस्था न करता आढळून आले. तसेच गुरे वाहतूकीचा परवाना देखील नव्हता.
याबाबतची माहिती पोलिसांना देण्यात आली. याबाबतची फिर्याद वेदांत विठ्ठल दळवी (वय २४ राहणार आरगाव फौजदारवाडी) यांनी दिली आहे. विनापरवाना गुरांची वाहतूक केल्या प्रकरणी लांजा पोलीसांनी नाझीम हुसेन फकीर ( वय ३५, राहणार मूर मुस्लिम वाडी, तालुका राजापूर) आणि आजीम हुसेन फकीर (वय ४२ राहणार मूर मुस्लिम वाडी, राजापूर ) या दोघांवर पोलिसांनी प्राण्यांचा छळ प्रतिबंधक अधिनियम १९६० चे कलम ११, (घ), (ड), (च), महाराष्ट्र पोलीस अधिनियम १९५१ चे कलम ११९, मोटार वाहन कायदा क. ६६/१९२, भारतीय न्याय संहिता २०२३ चे कलम ३(५) प्रमाणे गुन्हा दाखल करण्यात आला आहे .
या घटनेत वापरण्यात आलेली २ लाख ५० हजार रुपयांची बोलेरो पिकअप गाडी तसेच ३० हजार रुपये किंमतीचे दोन बैल असा एकूण २ लाख ८० हजार रुपयांचा मुद्देमाल पोलिसांनी जप्त केला आहे. याप्रकरणी अधिक तपास पोलीस करत आहेत