संगमेश्वर:- तालुक्यातील उजगाव बौद्धवाडी येथील योगेश धोंडूराम सावंत (वय ४५) या तरुण चालकाचा हृदयविकाराच्या झटक्याने मृत्यू झाल्याची अत्यंत दुःखद घटना शनिवारी दुपारी सुमारे ३ वाजता घडली.
सावंत हे सीएनजी वाहनावर चालक म्हणून नोकरी करत होते. नेहमीप्रमाणे ते डिंगणीहून देवरूखकडे परतत असताना अचानक छातीत तीव्र वेदना जाणवू लागल्या. त्यांनी जवळच असलेल्या दुसऱ्या वाहनचालकाला आपली प्रकृती सांगितली, त्यानंतर सदर चालकाने तत्काळ सावंत यांना उपचारासाठी देवरूख ग्रामीण रुग्णालयात दाखल केले. मात्र, वैद्यकीय अधिकाऱ्यांनी तपासणी करून त्यांना मृत घोषित केले.
वैद्यकीय सूत्रांनी दिलेल्या माहितीनुसार, योगेश सावंत यांचा मृत्यू हृदयविकारामुळे झाल्याचा प्राथमिक अंदाज व्यक्त करण्यात आला आहे. विशेष म्हणजे काही महिन्यांपूर्वीच त्यांच्या वडिलांचे निधन झाले होते. त्यानंतर घराच्या आधारस्तंभावर काळाने झडप घातल्याने सावंत कुटुंबावर दुहेरी दुःख कोसळले आहे.
