रत्नागिरी:- अल्पवयीन मुलीला पळवून नेऊन तिच्यावर शारिरीक अत्याचार केल्या प्रकरणी न्यायालयाने आरोपीला जन्मठेपेची शिक्षा आणि 27 हजार रुपयांचा दंड ठोठावला. अत्याचाराची ही घटना 11 सप्टेंबर 2018 रोजी घडली होती.
विकास दिलीप जाधव (वय 24, रा. नावली, ता. पन्हाळा -कोल्हापूर) असे आरोपीचे नाव आहे. त्याच्यविरोधात पिडीतेची मावशीने 12 सप्टेंबरला शहर पोलिस ठाण्यात तक्रार दिली होती. आरोपी विकास जाधव हा कोल्हापूरहून रत्नागिरीत राहणार्‍या नातेवाईकांकडे यायचा. तिथे त्याची ओळख पिडीत अल्पवयीन मुलीशी झाली होती. ती अल्पवयीन असल्याचे माहिती असतानाही आरोपीने पिडीत मुलीला ती कॉलेजला गेली असताना तिला फुस लावून पळवून नेले. जाताना त्याने रत्नागिरीतील एका मंदिरात विवाह केला. तिथून त्याने तिला कोल्हापूरला नेले. तेथे तिच्याशी शारिरीक अत्याचार केला. यानंतर पिडीत अल्पवयीन दोन महिन्यांची गरोदर राहिली.
दरम्यान, ही बाबत पिडीतेच्या मावशीला समजताच तिने शहर पोलिस ठाण्यात तक्रार दिली. तक्रारीवरून पोलिसांनी संशयिताविरुद्ध भादवी कलम 363, 376 (2) (5), 376 (2)(एन) आणि लैंगीक अत्याचारापासून बालकांचे संरक्षण कायदा (पोक्सो) 3, 4 व 5, 6 अन्वये गुन्हा दाखल केला होता. याचा तपास तत्कालीन पोलिस निरीक्षक सुप्रिया बंगडे करत होत्या. तपासात पोलिसांनी संशयिताला अटक करुन दोषारोपपत्र न्यायालयात दाखल केले होते. बुधवारी या खटल्याचा निकाल येथील विशेष पॉस्को न्यायालयात लागला. सरकारी पक्षातर्फे अ‍ॅड. मेघना नलावडे यांनी काम पाहिले असून त्यांनी या खटल्यात 15 साक्षीदार तपासले. त्यांचा युक्तिवाद ग्राह्य मानून विशेष पॉस्को न्यायाधीश वैजयंतीमाला राऊत यांनी आरोपीला 363 खाली 2 वर्षे शिक्षा व 2 हजार दंड, 376(2)(5) मध्ये 10 वर्षे शिक्षा 5 हजार दंड, 376 (2) (एन) खाली 10 वर्षे शिक्षा 5 हजार दंज, तर पॉस्को 3,4 मध्ये 7 वर्षे शशिक्षा 5 हजार दंड आणि 5,6 खाली जन्मठेप व 10 हजार दंडाची अशी एकूण 27 हजार दंड ठोठावला. या खटल्यात पैरवी अधिकारी म्हणून महिला पोलिस हवालदार सोनाली शिंदे काम पाहिले.
