चिपळूण पिंपळी नाका येथील घटना
चिपळूण:- दुचाकी लावण्यासाठी जागा मागितल्याच्या आणि गाडीचा किरकोळ धक्का लागल्याच्या कारणावरून एका ५७ वर्षीय व्यक्तीला लाथाबुक्क्यांनी आणि दगडाने डोक्यात मारून जखमी केल्याची धक्कादायक घटना चिपळूण येथील पिंपळी नाका येथे घडली आहे. याप्रकरणी दोन जणांविरुद्ध चिपळूण पोलीस ठाण्यात गुन्हा दाखल करण्यात आला आहे. ही घटना रविवार, २४ मे रोजी रात्री ७:३० वाजण्याच्या सुमारास घडली असून, २५ मे रोजी मध्यरात्री १ वाजता या प्रकरणी पोलिसांत गुन्हा नोंदवण्यात आला आहे.
फिर्यादी सतीश हनुमंत नलावडे (वय ५७, रा. पिंपळी खुर्द, मारुती नगर, पाष्टेवाडी, ता. चिपळूण) हे रविवारी रात्री साडेसातच्या सुमारास पिंपळी नाका येथे मुलांना खाऊ घेण्यासाठी गेले होते. तिथे उपस्थित असलेले आरोपी बाळू चव्हाण यांना नलावडे यांनी, “मला गाडी लावायची आहे, तुम्ही थोडे बाजूला व्हा,” असे सांगितले.
या साध्या बोलण्याचा राग येऊन आरोपी बाळू चव्हाण याने नलावडे यांना थेट शिवीगाळ करायला सुरुवात केली आणि “तुला गाडी लावायला दुसरीकडे जागा नाही का?” असे म्हणून वाद घातला. नलावडे आपली दुचाकी बाजूला घेत असताना, त्यांच्या गाडीचा आरोपी बाळू चव्हाण याला किरकोळ धक्का लागला.
गाडीचा धक्का लागताच आरोपी बाळू चव्हाण याने नलावडे यांच्या जवळ जाऊन त्यांच्या थेट कानाखाली लगावली. याच वेळी तिथे असलेल्या सुयोग चव्हाण याने नलावडे यांचे दोन्ही हात पाठीमागून घट्ट धरून ठेवले आणि शिवीगाळ केली. त्यानंतर बाळू चव्हाण याने रस्त्याकडेला असलेला एक मोठा दगड उचलून थेट नलावडे यांच्या डोक्यात मारला. या जीवघेण्या हल्ल्यात नलावडे यांच्या डोक्याला गंभीर दुखापत झाली असून ते जखमी झाले आहेत.
या मारहाणीनंतर सतीश नलावडे यांनी चिपळूण पोलीस ठाण्यात रीतसर तक्रार दाखल केली. पोलिसांनी आरोपी बाळू चव्हाण आणि सुयोग चव्हाण (दोघेही रा. पिंपळी खुर्द, ता. चिपळूण) यांच्याविरुद्ध गु.र.नं. १४५/२०२६, भारतीय न्यायसंहिता अधिनियम २०२३ चे कलम ११८(१), ११५(२), ३५२, ३(५) अन्वये गुन्हा दाखल केला आहे. पोलीस या प्रकरणाचा पुढील तपास करत आहेत.
