रत्नागिरी:- शहरातील जयस्तंभ परिसरात टेम्पो आणि दुचाकीस्वारात झालेल्या वादातून टेम्पो चालकाने दुचाकीस्वाराला मारहाण केल्याची घटना गुरुवारी दुपारी घडली आहे. याप्रकरणी रत्नागिरी शहर पोलीस ठाण्यात अदखलपात्र गुन्ह्याची नोंद करण्यात आली आहे.
मिळालेल्या माहितीनुसार, संबंधित तरुण हा जमीन प्रकरणाच्या सुनावणीला हजर राहून दुचाकीवरून जयस्तंभ परिसराच्या दिशेने येत होता. यावेळी समोरून येणारा टेम्पो आणि दुचाकी समोरासमोर आल्याने दोन्ही चालकांमध्ये शाब्दिक वाद सुरू झाला. या वादाचे पर्यवसान मारहाणीत झाले असून, रागाच्या भरात टेम्पो चालकाने दुचाकीस्वाराला मारहाण केली.
घटनेची माहिती मिळताच दोन्ही बाजूंचे नातेवाईक तातडीने घटनास्थळी दाखल झाले, ज्यामुळे परिसरात काही काळ तणावाचे आणि गर्दीचे वातावरण निर्माण झाले होते. या घटनेप्रकरणी रत्नागिरी शहर पोलीस ठाण्यात अदखलपात्र गुन्ह्याची नोंद करण्यात आली असून पोलीस पुढील कारवाई करत आहेत.
