चिपळूण तालुक्यातील तुरबंव येथील घटना
चिपळूण:- घरकामात व्यस्त असताना साप चावल्याने एका ७९ वर्षीय वृद्ध महिला गंभीर जखमी झाली, आणि दुर्दैवाने उपचारादरम्यान तिचा मृत्यू झाल्याची हृदयद्रावक घटना तुरबंव रोहिदासवाडी येथे घडली आहे. सुमित्रा तुकाराम सावर्डेकर (वय ७९, रा. तुरबंव रोहिदासवाडी, ता. चिपळूण, जि. रत्नागिरी) असे मृत वृद्धेचे नाव आहे. या घटनेमुळे संपूर्ण रोहिदासवाडी परिसरात हळहळ व्यक्त केली जात आहे.
मिळालेल्या माहितीनुसार, ९ ऑगस्ट रोजी सकाळी पावणेआठच्या सुमारास सुमित्रा सावर्डेकर या आपल्या राहत्या घरी नेहमीप्रमाणे सकाळची साफसफाई करत होत्या. घर झाडलोट करत असताना कोपऱ्यात दडून बसलेल्या सापाने त्यांच्यावर अचानक हल्ला करत त्यांना चावा घेतला. साप चावल्याचे लक्षात येताच कुटुंबीयांनी तत्परता दाखवत त्यांना तातडीने डेरवण येथील बी. के. वालावलकर रुग्णालयात उपचारासाठी दाखल केले.
रुग्णालयात डॉक्टरांनी त्यांच्यावर तातडीने उपचार सुरू केले. मात्र, उपचारादरम्यान विष शरीरात पसरल्याने किंवा शरीरावर झालेल्या गंभीर परिणामांमुळे त्यांना अचानक तीव्र श्वास घेण्यास त्रास जाणवू लागला. डॉक्टरांनी त्यांना वाचवण्याचे शर्थीचे प्रयत्न केले, परंतु उपचाराला प्रतिसाद न मिळाल्याने तेथील डॉक्टरांनी तपासणीअंती त्यांना मृत घोषित केले.
याप्रकरणी मृत सुमित्रा सावर्डेकर यांची मुलगी सुमन संभाजी पालशेतकर यांनी दिलेल्या खबरीवरून सावर्डे प्राथमिक आरोग्य केंद्र व संबंधित पोलीस ठाण्यात घटनेची नोंद करण्यात आली आहे. भारतीय नागरिक सुरक्षा संहिता कलम १९४ अन्वये अकस्मात मृत्यू (आ. मृ. क्रमांक १६/२०२६) म्हणून दुपारी १२.३९ वाजता या प्रकरणाची नोंद झाली असून, पोलीस या प्रकरणाचा पुढील अधिक तपास करत आहेत.
