रत्नागिरी:- खेड पोलिसांनी बेकायदेशीर दारू विक्री करणाऱ्या विरोधात कारवाई तीव्र केली आहे. दोन ठिकाणी छापे टाकत १ लाख २२ हजारांचा मुद्देमाल जप्त करण्यात आला आहे. तसेच दोघा आरोपींवर गुन्हे दाखल करण्यात आले आहेत.
दिनांक 12 मार्च रोजी, गोपनीय बातमीच्या आधारे सपोनि. सुजीत गडदे, प्रभारी अधिकारी, खेड पोलीस ठाणे व पथकामार्फत केळणे गवळवाडी-आंबडस येथे देशी-विदेशी मद्य साठा करणाऱ्या इसमांवर महाराष्ट्र दारूबंदी कायदा अन्वये छापे टाकण्यात आले.
या छाप्यांमध्ये, केळणे गवळवाडी-आंबडस येथील एका दुकानाचा पाठीमागील बाजूस असणाऱ्या खोलीत एकूण १ हजार २५० विविध देशी-विदेशी मद्याच्या बाटल्या असणारा एकूण १ लाख २२ हजार ५०० रुपये किंमतीचा मुद्देमाल जप्त करण्यात आला. तसेच आरोपी अमित सदानंद करंजकर (वय ३९ वर्षे, रा. आंबडस) याला गैर कायदा व बिगर परवाना तसेच शासनाचे कोणतेही शुल्क न भरता नागरिकांना वाढीव भावाने विक्री करत असताना मिळून आल्याने महाराष्ट्र दारूबंदी कायदा अन्वये ताब्यात घेण्यात आलेले आहे. या प्रकरणी खेड पोलीस ठाणे येथे गुन्हा रजि. नं_६३/२०२३ महाराष्ट्र दारूबंदी कायदा कलम ६५(ई), १८० अन्वये गुन्हा दाखल करण्यात आलेला आहे.
दुसऱ्या कारवाईत सपोनि. सुजीत गडदे, प्रभारी अधिकारी, खेड पोलीस ठाणे व पथकाने दिनांक १२ मार्च रोजी आंबडस, खेड मधीलच खोतवाडी येथील दुसऱ्या छाप्यामध्ये, गावठी हातभट्टीची दारू विक्री करणाऱ्या संतोष ज्ञानेश्वर मोरे वय ४८ वर्षे रा. आंबडस याला २ हजार २३० किंमतीच्या मुद्देमालासह ताब्यात घेण्यात आले. या प्रकरणी देखील खेड पोलीस ठाणे येथे महाराष्ट्र दारूबंदी कायदा कलम ६५ (ई) अन्वये गुन्हा दाखल करण्यात आला.
ही कारवाई खालील सपोनि श्री. सुजित गडदे, प्रभारी अधिकारी, खेड पोलीस ठाणे यांचेसह पोकॉ/1291 श्री. अजय कडू, खेड पोलीस ठाणे, पोकॉ/1315 श्री. रुपेश जोगी, खेड पोलीस ठाणे, पोकॉ/823 श्री. राहुल कोरे, खेड पोलीस ठाणे, चालक पोहवा/213 श्री. दिनेश कोटकर, खेड पोलीस ठाणे यांनी केली आहे.
