रत्नागिरी:- तालुक्यातील खरवते येथील तीव्र उतारातील वळणावर दुचाकी घसरुन झालेल्या अपघातात दुचाकीवर पाठीमागे बसलेल्या वृध्दाचा जागीच मृत्यू झाला. संजय सखाराम सनगरे (६०, रा. कोतवडे, रत्नागिरी) असे अपघातात मृत्यू झालेल्या वृध्दाचे नाव आहे. अपघाताची ही घटना मंगळवारी (ता. ११) सकाळी साडेदहाच्या सुमारास खरवते रस्त्यावरील तीव्र उतारातील वळणावर घडली.
पोलिसांकडून मिळालेल्या माहितीनुसार मंगळवारी सकाळी सुर्यकांत जयदेव वारेकर (५०, रा. कोतवडे, रत्नागिरी) हे संजय सनगरे यांच्या सोबत कोतवडे येथील महालक्ष्मी मंदिरात देवभेटणेचा कार्यक्रम आटोपल्यावर आपल्या ताब्यातील दुचाकी (क्र. एमएच-०८ बीए-०७०६) वर पाठीमागे संजय सनगरे यांना बसवून खरवते येथे जात होते. ते खरवत येथील तीव्र उतारातील वळणावर आले असता सुर्यकांत वारेकर यांचा दुचाकीवारील ताबा सूटला. त्यामुळे दुचाकी घसरुन २० फुट दरीत कोसळली या अपघातामध्ये संजय सनगरे यांना गंभीर दुखापत झाल्याने त्यांचा जागीच मृत्यू झाला. अपघाताची माहिती मिळताच ग्रामीण पोलिसांनी तातडीने घटनास्थळी धाव घेत मृतदेहाचा पंचनामा करुन उत्तरीय तपासणीसाठी जिल्हा शासकिय रुग्णालयात पाठवला. सायंकाळी उशिरापर्यंत ग्रामीण पोलिस ठाण्यात अपघाताची नोंद करण्याची कार्यवाही सुरु होती.
