रत्नागिरी:- सावकारी कर्जाच्या व्यवहारातून इनोव्हा गाडी आणि रोख रक्कम असा एकूण 20 लाख 10 हजार रुपयांचा मुद्देमाल लांबवल्याप्रकरणी सहा जणांविरोधात शहर पोलिस ठाण्यात गुन्हा दाखल करण्यात आला आहे. ही घटना 30 ऑक्टोबर 2020 रोजी घडली असून याबाबत बुधवार 2 डिसेंबर रोजी तक्रार देण्यात आली आहे.
गणेश रामचंद्र शेडगे (रा.पूणे) आणि इतर 5 जणांविरोधात हा गुन्हा दाखल करण्यात आला असून त्यांच्याविरोधात संतोष विश्वनाथ जगदाळे (40,मुळ रा.गोबगाव पूणे सध्या रा.सिध्दविनायक नगर,रत्नागिरी) यांनी तक्रार दिली आहे.त्यानुसार, 2018 साली आर्थिक अडचणीमुळे जगदाळे यांनी गणेश शेडगेकडून व्याजाने 25 लाख रुपये घेतले होते.या कर्जाची परतफेड त्यांनी 55 लाख रुपये देउन केली होती.परंतू शेडगेकडून आणखी पैशांची मागणी होत होती.
यातूनच 30 ऑक्टोबर रोजी सकाळी 9 वा.सुमारास संतोष जगदाळे त्यांच्या मालकीच्या इनोव्हा कारवरील चालक समीर ठाकूरला पैसे देण्यासाठी मजगाव येथे भाड्याचे पैसे देण्यासाठी आपल्या दुचाकीने गेले होते.त्यांनी समीरला फोन केला असता त्याने काही वेळातच मजगाव येथे येतो असे सांगितले.जगदाळे समीरची वाट पहात असताना एका स्विफ्ट कारमधून गणेश शेडगे आणि त्याचे 5 साथिदार तिथे आले.त्यांनी संतोष जगदाळे यांना जबरदस्तीने गाडीतून जे.के.फाईल्स चौकात नेउन तिथे पैशांची मागणी केली.जगदाळे यांनी माझ्याकडे पैसे नाहीत असे सांगून समीरला फोन करुन त्या ठिकाणी बोलावले.
काहीवेळाने जगदाळे यांचा चालक समीर ठाकूर इनोव्हागाडी घेउन जे.के.फाईल्स येथे आला.तेव्हा स्विफ्टमधील दोघांनी इनोव्हा गाडीचा ताबा घेत समीरलाही सोबत घेउन दोन्ही गाड्या हातखंबा येथे घेउन गेले.त्याठिकाणी इनोव्हामध्ये डिझेल भरण्यासाठी गणेश शेडगेने संतोष जगदाळे यांना शिवीगाळ व दमदाटी करत पैशांची मागणी करत त्यांच्या खिशातील 10 हजार रुपये हिसकावून घेतले.डिझेल भरल्यानंतर त्यांनी जगदाळे आणि त्यांचा चालक समीर ठाकूरला परकार हॉस्पिटलजवळ सोडून संशयित दोन्ही गाड्या घेउन फरार झाले.या सर्व प्रकारामुळे संतोष जगदाळे यांना धक्का बसला होता.त्यामुळे ते आपले रहाण्याचे ठिकाणी सारखे बदलत होते.अखेर या धक्क्यातून सावरल्यानंतर त्यांनी बुधवारी शहर पोलिसांकडे तक्रार दिली.याप्रकरणी अधिक तपास शहर पोलिस निरीक्षक अनिल लाड करत आहेत.
