धामापूर येथील घटना
संगमेश्वर:- तालुक्यातील धामापूर तर्फे संगमेश्वर येथील एका ७५ वर्षीय वृद्धाने एकाकीपणाला कंटाळून गडनदीच्या पात्रात उडी घेऊन आपली जीवनयात्रा संपवल्याची दुर्दैवी घटना घडली आहे. रामचंद्र रावजी महाडीक असे मृत वृद्धाचे नाव आहे.
मिळालेल्या माहितीनुसार, रामचंद्र रावजी महाडीक (वय ७५, रा. धामापूर तर्फे संगमेश्वर) हे गेल्या काही काळापासून एकाकीपणा जाणवत असल्याने मानसिक तणावाखाली होते. याच नैराश्यातून ते दि. २१ एप्रिल रोजी दुपारी २ वाजण्याच्या सुमारास कोणालाही काहीही न सांगता घरातून निघून गेले होते.
कुटुंबीयांनी त्यांचा शोध घेतला असता, दि. २२ एप्रिल रोजी सकाळी ७:४५ वाजण्याच्या सुमारास निमरीपार येथील गडनदीच्या पाण्याच्या पात्रात त्यांचा मृतदेह तरंगताना आढळून आला. एकाकीपणाला कंटाळून त्यांनी नदीत उडी घेऊन आत्महत्या केल्याचे प्राथमिक तपासात निष्पन्न झाले आहे.
या घटनेची माहिती मिळताच संगमेश्वर पोलिसांनी घटनास्थळी धाव घेऊन पंचनामा केला. याप्रकरणी संगमेश्वर पोलीस ठाण्यात बी.एन.एस.एस. कलम १९४ अन्वये आकस्मिक मृत्यू म्हणून नोंद करण्यात आली आहे.
