ड्रोन कॅमेर्याने घोटाळा उघड, चौकशीची मागणी
रत्नागिरी:- मासेमारीसाठी वापरात नसलेल्या मच्छीमार नौकांचे नाव नंबर वापरून दुसर्याच बेकायदेशीर नौका मासेमारी करत असल्याचा घोळ ड्रोन कॅमेराने टिपलेल्या छायाचित्रावरून चव्हाट्यावर आला आहे. ड्रोन कॅमेर्याने टिपलेल्या छायाचित्रानुसार मत्स्यव्यवसाय विभागाने सुनावणीसाठी येण्याची नोटीस मालकांना आल्यानंतर हा प्रकार उजेडात आला आहे. या प्रकरणी संबंधित नौका मालकांनी पोलिस अधिक्षकांसह सहाय्यक मत्स्यव्यवसाय विभागाकडे तक्रारी करून चौकशी करण्याची मागणी केली आहे.
रत्नागिरीच्या समुद्रात अल फातिमा नावाची नौका प्रतिबंधित क्षेत्रात मासेमारी करत असल्याचे ड्रोन कॅमेर्यातून टिपलेल्या छायाचित्रातून स्पष्ट झाल्यानंतर मत्स्यव्यवसाय विभागाकडून सुनावणी कार्यवाहीसाठी नौका मालकांना नोटीस देण्यात आली. नौका मालक मुस्ताक मोहम्मद वस्ता यांना ही नोटीस मिळाली.
नोटीस मिळाल्यानंतर नौका मालक सुनावणीसाठी सहाय्यक मत्स्यव्यवसाय आयुक्त तथा अधिनिर्णय अधिकार्यांसमोर गेले असता त्यांनी आपल्या नौकेबाबत माहिती दिली. त्यांची अल फातिमा नावाची नौका वर्षभरापूर्वीच समुद्रात लाटेच्या मार्याने समुद्रात वाहून जात बुडून पूर्णतः नष्ट झाली आहे. ही माहिती त्यांनी अभिनिर्णय अधिकारी तथा सहाय्यक मत्स्यव्यवसाय आयुक्तांसमोर मांडली. त्याचबरोबर आपल्या नौकेचे नाव नंबर वापरून कोणीतरी बेकायदेशीर नौकेने मासेमारी करत असल्याची लेखी तक्रारही केली आहे. सागरी सुरक्षिच्यादृष्टीने हीच तक्रार पोलिस अधिक्षकांकडेसुद्धा करण्यात आली आहे. पोलिसांनी तातडीने तपासणी करण्याची विनंतीही तक्रारीद्वारे करण्यात आली आहे.
दुसरी जाविदी मासेमारी नौका प्रतिबंधित समुद्रक्षेत्रात एलईडी प्रकाशात मासेमारी करत असल्याने नौका मालक असिफ जावेद वस्ता यांना सुनावणीसाठी बोलावण्यात आले. ड्रोन कॅमेर्याने टिपलेले या नौकेचे छायाचित्र दाखवण्यात आले. त्यावेळी नौका मालकाला ती नौका त्यांची नसल्याचे लक्षात आले. याबाबत नौका मालक असिफ वस्ता यांनीही पोलिस अधिक्षकांसह सहाय्यक मत्स्यवसाय आयुक्तांकडे तक्रार करून चौकशी करण्याची मागणी केली आहे.
आपल्या बोटीचा क्रमांक आणि नाव दुसर्याच बोटीवर लाऊन बेकायदेशीर मासेमारी केली जात आहे. याबाबत पोलिस आणि मत्स्यव्यवसाय विभागाने चौकशी करून कठोर कारवाई करण्याची मागणी केली आहे. दरम्यान आसिफ वस्ता यांच्या नौकेची मत्स्यव्यवसाय विभागाच्या अधिकार्यांच्या नुकतीच पाहणी करण्यात आली आहे.
