चिपळूण:- तालुक्यातील कळवंडे येथील बौंद्धवाडीजवळ गुरुवारी दुपारी १.३० वाजता झायलो गाडीचा रिक्षाला धडक बसून भीषण अपघात झाला. या अपघातात रिक्षातील पती-पत्नीला गंभीर दुखापत झाली. यात पत्नीचा जागीच मृत्यू झाला. तर रिक्षाचालकासह झायलो चालक जखमी असून त्यांच्यावर खासगी रूग्णालयात उपचार सुरू आहेत.
आशा रविंद्र वरपे (४५) यांचा या अपघातात मृत्यू झाला. तसेच रिक्षा चालक रविंद्र नारायण वरपे (रा. दोघेही कळवंडे वरपेवाडी) व झायलो चालक नंदेश सदाशीव वरपे हे जबर जखमी झाले आहेत. कळवंडे वरपेवाडी येथील रविंद्र वरपे हे पत्नीसह रिक्षाने जात असताना समोरून येणाऱ्या झायलो गाडीची रिक्षाला धडक बसली. यामध्ये रिक्षा दूरवर फेकली गेली. याघटनेत आशा वरपे यांचा जागीच मृत्यू झाला. त्यांना कामथे उपजिल्हा रूग्णालयात नेण्यात आले. तसेच रविंद्र वरपे यांच्या पायाला गंभीर दुखापत झाली आहे. नंदेश वरपे हाही जखमी झाल्याने या दोघांवर खासगी रूग्णालयात उपचार सुरू आहेत. या अपघाताची माहिती मिळताच पोलिसांनी घटनास्थळी धाव घेतली. यानंतर पोलिस हवालदार सुभाष भुवड यांनी घटनास्थळाचा पंचनामा केला. रात्री पर्यंत अपघाताची नोंद पोलीस स्थानकात दाखल झाली नव्हती.
