चिपळूण:- चिपळूण तालुक्यातील फुरुस येथे जंगलात गुरे चरवण्यासाठी गेलेल्या ३५ वर्षीय तरुणावर गवा रेड्याने हल्ला चढवून पोटात शिंगे घुसवल्याने गंभीर जखमी झालेल्या तरुणाला रुग्णालयात दाखल करण्यात आले होते. ही घटना मंगळवार 19 जुलै रोजी दुपारी 12 वाजण्याच्या सुमारास घडली होती. त्या तरुणावर तातडीने शस्त्रक्रिया करण्यात आली होती. मात्र उपचार सुरू असताना आज सोमवार 25 जुलै रोजी त्याचा मृत्यू झाल्याची माहिती डॉक्टरांनी दिली. अखेर या तरुणाची मृत्यूशी झुंज अपयशी ठरली.
फुरूस बौद्धवाडी येथील शेतकरी सतीश शांताराम जाधव हा मंगळवारी 19 जुलै रोजी नेहमीप्रमाणे गुरे चरण्यासाठी गेला होता . त्याच्या सोबत त्याचा भाऊही होता . गुरांच्या कळपातून एक बैल भरकटल्याने त्याला आणण्यासाठी सतीश जाधव गेला असताना त्याच्यावर अचानक गव्याने हल्ला चढवला . त्यामुळे सतीशने आरडाओरड केली . त्याचा आवाज ऐकून त्याचा भाऊ धावत आला आणि त्याने कसेबसे त्याला वाचवले. या हल्ल्यात गंभीर जखमी झालेल्या सतीशला डेरवण रुग्णालयात दाखल केले . सतीशच्या पोटात गव्याची शिंगे घुसली होती. अनेक ठिकाणी मोठ्या जखमा झाल्या होत्या. सतीश अत्यवस्थ अवस्थेत रुग्णालयात दाखल होताच तातडीने शस्त्रक्रिया करण्यात आल्या होत्या. 5 दिवस तो मृत्यूशी झुंज देत होता. अखेर त्याची मृत्यूशी झुंज अपयशी ठरली. त्याच्या मृत्यूने फुरूस गावात शोक व्यक्त करण्यात येत आहे.
