रत्नागिरी:- सेल्सटॅक्स ऑफिसर असल्याचे सांगत तुमच्या मुलीला त्याच ठिकाणी नोकरी लावण्याचे आमिष दाखवून प्रौढाची सुमारे 4 लाख रुपयांची फसवणूक केली. याप्रकरणी महिला पोलीस कॉन्स्टेबलसह एकावर शहर पोलीस ठाण्यात गुन्हा दाखल करण्यात आला आहे. फसवणुकीची ही घटना 12 जानेवारी ते 4 मार्च 2020 रोजी घडली आहे.
विठ्ठल रामचंद्र पोवार आणि भारती ज्ञानदेव पाटील (दोन्ही रा. शंखेश्वर मधुबन बिल्डिंग, रत्नागिरी ) अशी गुन्हा दाखल करण्यात आलेल्या दोन संशयितांची नावे आहेत. त्यांच्या विरोधात अशोक विठ्ठल नाचणकर (58, रा. मिरजोळे, रत्नागिरी ) यांनी पोलिसांकडे तक्रार दिली आहे. त्यानुसार, विठ्ठल पोवारने अशोक नाचणकर यांना आपल्याकडील बनावट ओळखपत्र दाखवून मी सेल्सटॅक्स ऑफिसर असल्याचे सांगत तुमच्या मुलीला नोकरी लावण्याचे आमिष दाखवले. त्यासाठी विठ्ठल पोवार, आणि भारती पाटील या दोघांनी संगनमताने रोख 2 लाख 2 हजार घेतले. त्यानंतर पोवारने आपल्या बँक खात्यात 1 लाख 49 हजार तर भारती पाटीलने आपल्या बँक खात्यात नाचणकर यांच्याकडून 49 हजार स्वीकारून फसवणूक केली.अधिक तपास शहर पोलीस करत आहेत.
