राजापूर:- त्रिवेंद्रम राजधानी एक्सप्रेसमधून प्रवास करणाऱ्या एका महिलेची अज्ञात चोरट्याने रोकड आणि इतर ऐवज चोरून नेल्याची घटना उघडकीस आली आहे. ही घटना १३ फेब्रुवारी २०२५ रोजी पहाटे ०३.०० ते ०५.०० वा. दरम्यान घडली. याप्रकरणी अज्ञात आरोपीविरुद्ध गुन्हा दाखल करण्यात आला आहे.
फिर्यादी महिला १२ फेब्रुवारी २०२५ रोजी त्रिवेंद्रम राजधानी एक्सप्रेसमधून हजरत निजामुद्दीन (दिल्ली) ते गोवा असा प्रवास करत होत्या. १३ फेब्रुवारी रोजी पहाटे ०३.०० ते ०५.०० वा. दरम्यान, गाडी रत्नागिरी कार्यक्षेत्रात आली असताना, त्यांच्या झोपेचा फायदा घेऊन अज्ञात व्यक्तीने त्यांची हँडबॅग चोरून नेली. या हँडबॅगमध्ये २० हजार रुपये रोख रक्कम आणि पर्समध्ये १५ हजार रुपये रोख रक्कम होती. याव्यतिरिक्त, ४ हजार रुपये किमतीची हँडबॅग, दोन एसबीआय बँकेची क्रेडिट कार्ड, स्टँडर्ड चार्टर्ड मनहॅटन कार्ड, कोटक बिझनेस कार्ड, अमेरिकन एक्सप्रेस कार्ड, आधारकार्ड, लायसन्स आणि एक पाऊच ज्यामध्ये पेन, कंगवा, लिपस्टिक इत्यादी वस्तू होत्या, असा एकूण ३९ हजार रुपयांचा ऐवज चोरीला गेला आहे.
या घटनेची तक्रार महिलेने १४ फेब्रुवारी रोजी मडगाव रेल्वे पोलीस स्टेशन येथे दाखल केली होती. मडगाव रेल्वे पोलिसांनी याप्रकरणी गुन्हा क्रमांक ००/२०२५ नोंदवला होता. त्यानंतर, पोलीस अधीक्षक कोकण रेल्वे मार्ग, गोवा यांच्या कार्यालयामार्फत हे कागदपत्र पुढील तपासासाठी राजापूर पोलीस ठाण्यात पाठवण्यात आले आहेत.
राजापूर पोलीस या अज्ञात चोरट्याचा शोध घेत आहेत. प्रवासात असताना आपल्या सामानाची काळजी घेण्याचे आवाहन पोलिसांनी केले आहे.
