रत्नागिरी:- शहरात चोरट्यांनी पुन्हा डोके वर काढले आहे. एका रात्रीत माळनाका परिसरातील चार दुकाने चोरट्यांनी फोडली. दोन फोडली तर दोन फोडण्याचा प्रयत्न झाला. यामुळे याबाबत शहर पोलिस ठाण्यात उशिरापर्यंत कोणतीही तक्रार दाखल झालेली नव्हती. चोरटे मात्र सीसी टीव्हीत कैद झाले असून शहर पोलिसांची एक टीम त्याचा शोध घेत आहे.
संपुर्ण रत्नागिरी शहर सीसी टीव्हीच्या निगराणीत आहे. ५६ सीसी टीव्हीचे जाळे शहरात पसरले आहे. त्याचे नियंत्रण कक्ष पोलिस मुख्यालयाजवळ आहे. त्यामुळे दिवसा या रात्री-अपरात्री शहरात होणाऱ्या हालचालींवर पोलिसांचे बारीक लक्ष असते. तसेच पोलिसांनी रात्रीची गस्त वाढवली आहे. याचा चांगला परिणाम दिसू लागला असून यामुळे चोरट्यांचा चांगलाच बंदोबस्त झाला होता. गेल्या काही महिन्यांपासून चोरीच्या घटना घटल्या होत्या. परंतु चोरट्यांनी पुन्हा डोके वर काढले असून एका रात्रीत चार चोऱ्या केल्या.
अतिथी भोजनालय फोडण्याचा प्रयत्न झाला. महाराजा इलेक्ट्रॉनिक फोडले, समर्थ कृपा जनरल स्टोअर आणि द्वारकामाई हॉटेल फोडले. यामध्ये जनरल स्टोअर आणि द्वारकामाई हॉटेलमध्येही चोरी झाली. या चोऱ्यांमध्ये चोरट्यांच्या हाती जास्त काही लागले नाही. परंतु अनेक ठिकाणी चोरटे सीसी टीव्हीत कैद झाले आहे. मात्र चोरट्यांनी अंगभर कपडे घातली होती आणि कानटोपीने तोंडही झाकले होते. त्यामुळे त्यांचा चेहरा दिसत नाही. याची माहिती मिळताच पोलिस निरीक्षक महेश तोरसकर आणि सहकारी घटनास्थळी दाखल झाले. त्यांनी पंचनामा केला, मात्र उशिरापर्यंत कोणी तक्रार दाखल केली नव्हती. पोलिसांनी सीसी टीव्ही फुटेजवरून या चोरट्यांच्या शोधासाठी एक टीम तपासासाठी रवाना केली आहे.
