रत्नागिरी:- तालुक्यातील कासारवेली पारवाडी येथे तरुणावर धारदार चाकूने वार झाल्याने खळबळ उडाली आहे. हल्ल्यात जखमी तरुणावर जिल्हा शासकीय रुग्णालयात उपचार सुरु असून त्याच्यावर जीवघेणा हल्ला करणारा आरोपी देखील तेथीलच आहे.
पोलिसांनी दिलेल्या माहितीनुसार सोमवारी सायंकाळी मनोहर डोर्लेकर हे नेहमीप्रमाणे कासारवेली पारवाडी येथे आपल्या सहकाऱ्यांसमवेत गप्पा मारत बसले होते. तेथे अचानक उमेश वसावे हा तरुण हातात धारदार सुरा घेऊन त्यांच्या दिशेने धावत आला आणि कुणाला काहीच समजण्या अगोदरच त्याने मनोहर डोर्लेकर यांच्या मानेवर, हातावर सपासप वार केले आणि तो घटनास्थळावरून पळून गेला.अचानक झालेल्या हा हल्ल्यात रक्तबंबाळ अवस्थेत असलेले मनोहर डोर्लेकर हे कासारवेली येथून चालत साखरतर येथे आले. त्यानंतर एका रिक्षा व्यवसायिकाने त्यांना जिल्हा शासकीय रुग्णालय दाखल केले.
या घटनेची माहिती मिळताच रत्नागिरी शहर पोलीस स्थानकाचे पोलीस निरीक्षक विनित चौधरी हे आपल्या सहकाऱ्यांसह घटनास्थळी दाखल झाले होते. पोलिसांच्या विशेष पथकाने हल्ला करणाऱ्या उमेशचा शोध घेतला. त्याला रात्री उशिरा शहर पोलिसांनी ताब्यात घेतले आहे. उमेश वसावे याने मनोहर डोर्लेकर यांच्यावर नेमका हल्ला का केला? हे रात्री उशिरापर्यंत स्पष्ट झाले नव्हते. याप्रकरणी पोलीस स्थानकात उमेश वसावे त्याच्याविरोधात गुन्हा दाखल करण्याची प्रक्रिया सूरु होती. उमेश वसावे याच्या विरोधात यापूर्वीही गुन्हे दाखल करण्यात आले आहेत. दारूच्या नशेत असलेला उमेश ग्रामस्थांवर हल्ले करतो. गेली चार ते पाच वर्ष तो शांत होता, परंतु पुन्हा त्याने गुन्हेगारी कारवाया सुरू केल्याने परिसरात त्याची दहशत निर्माण झाली आहे. पोलिसांनी त्याचा बंदोबस्त करावा अशी मागणी स्थानिक ग्रामस्थांनी केले आहे.
