चिपळूण:- चिपळूण तालुक्यातील मुर्तवडे शाखा डाकघरात तब्बल दोन लाख रुपयांच्या अपहाराचा प्रकार उघडकीस आला आहे. या प्रकारामुळे स्थानिक खातेदारांमध्ये एकच खळबळ उडाली आहे. अपहारप्रकरणी पोस्टमास्तर ज्ञानेश्वर यशवंत रहाटे (रा. मुर्तवडे) याच्याविरोधात सावर्डे पोलिस ठाण्यात गुन्हा दाखल करण्यात आला आहे.
या संदर्भात डाकघर निरीक्षक हिमांशू जोशी यांनी सावर्डे पोलिसांकडे तक्रार दाखल केली. तपासात समोर आलेल्या माहितीनुसार, हा आर्थिक अपहार १८ डिसेंबर २०१७ ते ७ नोव्हेंबर २०१८ तसेच २८ फेब्रुवारी २०२४ या कालावधीत घडल्याचे स्पष्ट झाले आहे. ज्ञानेश्वर रहाटे हे त्या काळात मुर्तवडे शाखा डाकघरात पोस्टमास्तर म्हणून कार्यरत होते. या काळात खातेदार रामचंद्र महादेव मांडवकर व वासंती रामचंद्र मांडवकर (दोघेही रा. मुर्तवडे) यांच्या नावाने पाच वर्षांची मुदत ठेव खाती प्रत्यक्षात न उघडता बोगस पासबुक तयार करून दोन लाख रुपयांचा अपहार केल्याचा आरोप आहे.
पोस्ट विभागाच्या अंतर्गत तपासात ही फसवणूक उघड झाल्यानंतर, संबंधित पोस्टमास्तरने अपहार केलेली रक्कम आणि त्यावरील व्याजासह एकूण तीन लाख रुपये विभागाकडे जमा केले. तरीदेखील, खातेदारांची खाती प्रत्यक्षात उघडण्यात आली नसल्याने, डाक विभागाच्या तक्रारीवरून पोलिसांनी त्याच्याविरोधात फसवणुकीचा गुन्हा नोंदवला आहे. या घटनेमुळे ग्रामीण भागातील डाकसेवा व्यवस्थेवरील विश्वासाला तडा गेला असून, या प्रकरणाचा पुढील तपास सावर्डे पोलिसांकडून सुरू आहे.
