रनपकडून कारवाई; 72 टक्के वसुली पूर्ण
रत्नागिरीः– पालिकेचा मालमत्ता कर थकविणाऱ्या शहरातील ४० जणांची मालमत्ता पालिकेने जप्त केली आहे. तर आतापर्यंत ७२ टक्के कर वसुली पुर्ण झाली असून त्यामध्ये ७० लाख रु.च्या धनादेशाचा समावेश आहे.
सन २०२०-२१ या आर्थिक वर्षाच्या कर वसुलीची मोहिम पालिकेने सुरू केली. शहरातील विविध मालमत्तांचा कर पालिकेमार्फत वसुल केला जातो. गतवर्षी कोरोनाचा प्रादुर्भाव वाढल्याने लॉकडाऊन करण्यात आले होते. त्यामुळे मार्च अखेर वसुलीचे उद्दीष्ट पुर्ण करणे पालिकेला शक्य झाले नव्हते.
यावर्षी पालिकेने वसुलीची धडक मोहिम सुरु केली आहे. कर थकविणाऱ्या करदात्यांवर जप्तीची कारवाई सुरु करण्यात आली असून ४० मालमत्ता सील करुन ताब्यात घेण्यात आल्या आहेत.
एकूण उद्दीष्टापैकी ७२ टक्के वसुली पूर्ण झाली आहे.
आज आर्थिक वर्षाचा अखेरचा दिवस असल्याने पालिकेचे कर वसुलीचे उद्दीष्ट शंभर टक्के पूर्ण होण्याची शक्यता संपली आहे. तरीहि अखेरच्या दिवशी जास्तीत जास्त करदात्यांनी कर जमा करण्यासाठी पालिका अधिकारी, कर्मचारी प्रयत्न करत आहेत. कर थकीत ठेवणाऱ्या कर दात्यांना पालिकेने नोटीस बजावली आहे. कोरोनाचा प्रादुर्भाव पुन्हा वाढू लागल्याने त्याचा अडथळा कर वसुलीत झाला आहे. मार्च अखेरपर्यंत कर न भरणाऱ्या करदात्यांची मालमत्ता सील करण्याची कारवाई करण्यात येणार आहे. यामुळे थकबाकीदार करदात्यांचे धाबे दणाणले आहेत.
