खेड:- तालुक्यातील बोरज येथील एका बंगल्यामध्ये दिवसाढवळ्या घरफोडीची घटना घडली असून, चोरट्यांनी बंद घराचे कुलूप तोडून आत प्रवेश करत कपाटातील २५ हजार रुपयांची रोकड चोरून नेली आहे. ही घटना बुधवार, २९ ऑक्टोबर २०२५ रोजी दुपारी ३.३० वाजताच्या सुमारास घडली असून, या प्रकाराने परिसरात भीतीचे वातावरण पसरले आहे. खेड पोलीस ठाण्यात दोन आरोपींविरुद्ध गुन्हा दाखल करण्यात आला असून, पोलीस तपास सुरू आहे.
मिळालेल्या माहितीनुसार, फिर्यादी संदीप बाळकृष्ण जाधव (वय ५०, रा. बोरज, सुरभी गार्डन, ता. खेड) यांच्या चुलत्यांचे, प्रकाश मुलु जाधव यांचे मौजे बोरज येथे बंगला आहे. २९ ऑक्टोबर २०२५ रोजी दुपारी सुमारे ३.३० वाजताच्या दरम्यान, प्रकाश जाधव यांचा बंगला बंद असताना आरोपींनी संधी साधली. आरोपी क्रमांक एक महेंद्र राजाराम प्रिदाणकर (रा. मोरवंडे कुंभारवाडी, ता. खेड) आणि त्याच्यासोबत असलेला एक अनोळखी इसम यांनी संगनमत करून ही चोरी केली.
चोरट्यांनी बंगल्याच्या मुख्य दरवाजाचा कडी-कोयंडा कोणत्यातरी धारदार हत्याराच्या मदतीने तोडला. दरवाजा तोडल्यानंतर त्यांनी घरात प्रवेश केला आणि कपाटात ठेवलेली २५ हजार रुपये रोख रक्कम चोरून नेली. या चोरीस गेलेल्या रकमेत ५०० रुपये दराच्या एकूण ५० नोटांचा समावेश असल्याचे फिर्यादीत नमूद करण्यात आले आहे. फिर्यादी संदीप जाधव यांना या घटनेची माहिती मिळताच, त्यांनी खेड पोलीस ठाणे गाठून तक्रार दाखल केली.
या घटनेची नोंद खेड पोलीस ठाण्यात दिनांक २९/१०/२०२५ रोजी रात्री ८.१६ वाजता करण्यात आली असून, गु.र.क्र. ३२७/२०२५ अन्वये आरोपी महेंद्र प्रिदाणकर आणि एका अनोळखी इसमाविरुद्ध भारतीय न्याय संहिता अधिनियम २०२३ चे कलम ३३१(३), ३०५(अ), ३(५) प्रमाणे गुन्हा दाखल करण्यात आला आहे. दिवसाढवळ्या, भर दुपारी रहिवासी भागात घरफोडी झाल्यामुळे नागरिकांमध्ये तीव्र संताप व्यक्त होत आहे. पोलिसांनी तात्काळ तपास सुरू केला असून, चोरीस गेलेल्या मालाचा आणि आरोपीचा शोध घेण्याचे काम सुरू आहे .
