रत्नागिरी:- तुझी आई आजारी आहे, तुला माहेरी सोडतो, असे सांगत महिलेचे दुचाकीवरून अपहरण करण्याचा प्रयत्न तालुक्यातील नाखरे येथे घडली. महिलेने केलेल्या प्रतिकारादरम्यान झालेल्या झटापटीत महिलेचा गाडीवरून पडून मृत्यू झाला. या घटनेनंतर पळून गेलेल्या संशयित अपहरणकर्त्यास पोलिसांनी अटक केली असून, त्याला दोन दिवसांची पोलिस कोठडी सुनावण्यात आली आहे.
ही घटना नाखरे साळवीवाडी येथील रस्त्यावर घडली. मनीषा मंगेश वारीसे ( वय ३५ ) असे मृत महिलेचे नाव असून दिगंबर शिंदे असे अटक केलेल्या संशयित अपहरणकर्त्याचे नाव आहे. मनीषा वारीसे या मोलमजुरी करून आपला उदरनिर्वाह करत होत्या. माघी चतुर्थीच्या दिवशी आपले काम आटपून त्या गावातील गणेश मंदिरात उत्सवासाठी गेल्या होत्या. तेथे दर्शन करून त्या परत येत असताना गावातील दिगंबर सुधाकर शिंदे पावसहून मावळंगे येथे जात होते. मनीषा वाटेत भेटल्यानंतर तुझी आई आजारी आहे, तुला माहेरी नेऊन सोडतो असे सांगून दिगंबरने तिला गाडीवर बसवले. पावस चावडीवाडी येथे तिचे माहेर आहे. तिथे आल्यावर गाडी न थांबवता त्याने गाडी तशीच पुढे नेली. त्यामुळे महिलेला संशय आल्याने नाखरे साळवीवाडी इथे तिने गाडी थांबविण्याचा प्रयत्न केला. त्यावेळी त्या दोघांमध्ये झटापट झाली आणि मनीषा वारीसे रस्त्यावर पडल्या. यात त्यांना गंभीर दुखापतही झाली. मात्र त्यावेळी त्यांना मदत न करता आपले पितळ उघडे पडण्याच्या भीतीने दिगंबर शिंदे याने तिला रस्त्याच्या बाजूला करून ठेवले आणि तो पळून गेला. ही घटना परिसरातील काही लोकांनी पाहिली होती. या दरम्यान मावळंगे येथील प्रदीप थूळ आपल्या कामगारांना घेऊन त्या रस्त्याने जात असताना त्यांना महिला रस्त्याच्या कडेला पडलेली दिसली. त्यांनी याची माहिती पूर्णगड सागरी पोलिस ठाण्यात दिली. त्यानंतर पोलिस तेथे पोचले तेव्हा ती महिला मृत असल्याचे निष्पन्न झाले. पोलिसांनी सुरवातीला आकस्मिक मृत्यू म्हणून नोंद केली होती.
या प्रकरणाची दखल जिल्हा पोलिस अधीक्षक मोहितकुमार गर्ग यांनी घेतली . त्यांनी ४ फेब्रुवारीला घटनास्थळी पाहणी करून पुढील तपासाच्या सूचना देऊन तपास पथक तयार करण्याचे आदेश दिले. त्यानुसार उपविभागीय पोलिस अधिकारी सदाशिव वाघमारे यांच्या उपस्थितीत पोलिस निरीक्षक विवेक अहिरे, पूर्णगड सागरी पोलिस ठाण्याचे पोलिस निरीक्षक सुरेश गावीत यांच्या मार्गदर्शनाखाली चार टीम तयार करण्यात आल्या होत्या. त्यांनी केलेल्या तपासात संशयिताची माहिती समजल्यानंतर त्याला दीड दिवसात अटक केली. दिगंबर सुधाकर शिंदे ( वय ३८ , रा . मावळंगे ) असे त्या संशयिताचे नाव आहे. त्याच्यावर गुन्हा दाखल करण्यात आला आहे.
