2 दिवसांची पोलीस कोठडी, 6 लाखाचा मुद्देमाल जप्त
लांजा:- लांजा शहराजवळ असलेल्या बेनी नदीवरील पुलाच्या लोखंडी प्लेट चोरी करण्यासाठी आलेल्या दोघाना लांजा पोलिसांनी सापळा रचून जेरबंद केले. ही घटना 31 जुलै रोजी रात्रीच्या सुमारास घडली.
पोलिसांनी दिलेल्या माहितीनुसार, या घटनेत लांजा पोलिसांनी एक तवेरा आणि एक बोलेरो अशा दोन गाड्यांसह दोन मोबाईल असा एकूण ६ लाख ५ हजार रुपयांचा मुद्देमाल जप्त केला आहे. देवधे धनावडे बस स्टॉप येथे बेनी नदीवर पुलाचे काम सुरू आहे. या पुलाच्या काम करण्यासाठी लागणाऱ्या लोखंडी प्लेट चोरण्याचा या चोरट्यांचा इरादा होता. या घटनेतील संशयित आरोपी अशोक नामदेव चौगुले ( २५ रा . हिंगणगाव , तालुका कवठे महाकाळ , जिल्हा सांगली ) आणि अतुल आदिकराव महाडिक ( २६ रा. शिवाजी चौक , मराठी शाळेजवळ , तालुका शिरोळ , जिल्हा कोल्हापूर ) अशी दोघांची नावे आहेत. लांजा पोलिस ठाण्यात गुन्हा दाखल करण्यात आला आहे . या दोन्ही चोरट्यांना पोलिसांनी लांजा न्यायालयासमोर उभे केले असता न्यायालयाने त्यांना ४ ऑगस्टपर्यंत पोलीस कोठडी सुनावली आहे.
