अज्ञात चोरट्याविरुद्ध गुन्हा दाखल
देवरूख:- रत्नागिरी जिल्ह्यातील संगमेश्वर तालुक्यातील करंबेळे फौजदारवाडी येथे एका बंद घरात अज्ञात चोरट्याने घरफोडीचा प्रयत्न केल्याची धक्कादायक घटना उघडकीस आली आहे. या प्रयत्नात चोरट्याला कोणतेही साहित्य लंपास करण्यात यश आले नसले तरी, घराचे नुकसान झाले आहे. या प्रकरणी देवरूख पोलीस ठाण्यात अज्ञात आरोपीविरुद्ध भारतीय न्यायसंहिता अधिनियम २०२३ च्या संबंधित कलमांनुसार गुन्हा दाखल करण्यात आला आहे.
करंबेळे फौजदारवाडी येथील रहिवासी संजयकुमार गंगाराम महाडीक (वय ५४) यांच्या बंद घरात हा प्रकार घडला आहे. फिर्यादी श्री. महाडीक यांच्या तक्रारीनुसार, दिनांक २३/१०/२०२५ रोजी सकाळी ११.३० वाजल्यापासून ते दिनांक ३०/१०/२०२५ रोजी सकाळी ०९.४५ वाजण्याच्या दरम्यान ही घटना घडली असावी.
मिळालेल्या माहितीनुसार, अज्ञात चोरट्याने महाडीक यांचे बंद घर हेरून घराची कौले काढून आत प्रवेश केला. घरात शिरल्यानंतर चोरट्याने लोखंडी कपाटे उघडून त्यातील कपडे अस्ताव्यस्त फेकले. मौल्यवान वस्तूंच्या शोधात चोरट्याने घरातील सामानाची उलथापालथ केली, परंतु त्याला चोरीसाठी काहीही मिळाले नाही. त्यामुळे चोरीचा प्रयत्न अयशस्वी ठरला आणि कोणताही माल चोरीला गेला नाही.
संजयकुमार महाडीक यांनी देवरूख पोलीस ठाण्यात तक्रार दाखल केली. पोलिसांनी घटनेची नोंद घेत गु.आर.नं. १२२/२०२५ अंतर्गत अज्ञात इसमाविरुद्ध भा.न्या.सं. अधिनियम २०२३ चे कलम ३३१(३), ३३१(४), ३०५, ६२ प्रमाणे गुन्हा दाखल केला आहे.
या घटनेमुळे करंबेळे फौजदारवाडी परिसरात भीतीचे वातावरण पसरले आहे. पोलीस उपनिरीक्षक स्तरावरील अधिकारी या प्रकरणाचा तपास करत असून, अज्ञात चोरट्याचा शोध सुरू आहे. विशेषतः बंद घरांना लक्ष्य करणाऱ्या या चोरट्याला लवकरात लवकर पकडण्याचे आव्हान पोलिसांसमोर आहे.
