रत्नागिरी:- रत्नागिरी शहरातील मध्यवर्ती भाग असलेल्या टिळक आळी परिसरातून एक अत्यंत धक्कादायक आणि धाडसी चोरीची घटना समोर आली आहे. आपल्या राहत्या घरातून कामानिमित्त बाहेर पडत असलेल्या एका वृद्ध महिलेच्या गळ्यातील सोन्याचे मंगळसूत्र भरदिवसा एका अज्ञात दुचाकीस्वार चोराने बळजबरीने हिसकावून पोबारा केला आहे.
या जबरी चोरीच्या प्रकरणी रत्नागिरी शहर पोलीस ठाण्यात अज्ञात चोरट्याविरुद्ध रीतसर गुन्हा दाखल करण्यात आला आहे. ही घटना सोमवार अठरा मे रोजी दुपारी सव्वाबारा वाजण्याच्या सुमारास टिळक आळी येथील पटवर्धन यांच्या घरासमोरील सार्वजनिक रस्त्यावर घडली असून यामुळे परिसरात महिलांच्या सुरक्षिततेचा प्रश्न पुन्हा एकदा ऐरणीवर आला आहे.
या संदर्भात पोलिसांकडून मिळालेल्या सविस्तर माहितीनुसार, फिर्यादी मुग्धा माधव मुळ्ये, वय त्रेसष्ट वर्षे, राहणार टिळक आळी, रत्नागिरी या सोमवार दुपारी सव्वाबारा वाजण्याच्या सुमारास काही कौटुंबिक कामानिमित्त आपल्या घरातून बाहेर पडल्या होत्या. त्या पटवर्धन यांच्या घरासमोरील रस्त्यावरून पायी चालत जात असताना, पाठीमागून आलेल्या एका अज्ञात दुचाकीस्वाराने त्यांच्याजवळ आपली दुचाकी आणली. काही समजण्याच्या आतच त्या चोराने मुग्धा मुळ्ये यांच्या गळ्यातील साठ हजार रुपये किमतीचे दोन तोळे वजनाचे सोन्याचे मंगळसूत्र अत्यंत वेगाने बळजबरीने हिसकावले आणि दुचाकीवरून रत्नागिरी मारुती मंदिरच्या दिशेने वेगाने पोबारा केला.
मंगळसूत्र हिसकावल्यानंतर पिडीत महिलेने आरडाओरड केली, मात्र तोपर्यंत चोरटा डोळ्यांदेखत पसार झाला होता. या घटनेची माहिती मिळताच पोलिसांनी परिसरात नाकाबंदी करून चोरट्याचा शोध घेण्याचा प्रयत्न केला, परंतु त्याचा सुगावा लागला नाही. सध्या रत्नागिरी शहर पोलीस परिसरातील सीसीटीव्ही फुटेजच्या मदतीने या अज्ञात दुचाकीस्वार चोराचा कसून शोध घेत आहेत.
