पाली:- मुंबई गोवा महामार्ग चौपदरीकरणाचे ठेकेदाराच्या निष्काळजीपणामुळे पाली बाजारपेठेतील जलवाहिनी फुटून पाणीपुरवठा गेल्या काही दिवसांपासून बंद आहे. पाली बाजारपेठेमध्ये महामार्ग चौपदरीकरणाचे कामकाज ठेकेदाराने सुरू केले असून त्यामध्ये जुन्या महामार्गाच्या लगत असणारी ग्रामपंचायतची शासकीय पाणी योजनेची जलवाहिनी स्थलांतरण करून घेणे आवश्यक होते परंतु ती तिथेच असल्याने ती फुटून गेल्या दिवसांपासून बाजारपेठ, नवीनवसाहत, कोल्हापूर रोड या भागातील पाणी पुरवठा बंद आहे.
बाजारपेठेमध्ये महामार्ग चौपदरीकरणाची ठेकेदाराकडून घाई केली जात आहे. त्यातच बाजारपेठच्या दोन्ही भागात रस्त्यालगत मातीचा भराव आणून सपाटीकरण करण्याचे काम केले जात आहे यामुळे जुन्या पाणी योजनेची जलवाहिनी फुटून पाणी पुरवठा मध्ये बंद आहे. मात्र याकामा अगोदर पाली ग्रामपंचायतची जुनी शासकीय पाणी योजना स्थलांतरण करणे आवश्यक होते. तसेच दोन्ही बाजुकडील चौपदरीकरणातील बाधीत होणारी बांधकामे हटवलेली असून खाजगी कंत्राटदाराने प्राधान्याने पाणी योजेनेचे जलवाहिनीचे स्थलांतरण करणे आवश्यक आहे. पालीतील या पाणीपुरवठा जलवाहिनीच्या कामाकडे राष्ट्रीय महामार्ग विभागाने वेळीच लक्ष देऊन ठेकेदाराकडून पर्यायी पाणी पुरवठा वाहिनी टाकण्याची व्यवस्था प्राधान्याने करून मगच काम करण्याची मागणी ग्रामस्थांकडून होत आहे.
