रत्नागिरी:- रत्नागिरी शहराची जीवनवाहिनी समजल्या जाणाऱ्या आणि नगरपालिकेच्या मालकीच्या पानवल धरणाच्या दुरुस्तीचे काम आता पूर्णत्वाकडे जात आहे. गेल्या अनेक वर्षांपासून प्रलंबित असलेला हा प्रश्न मार्गी लावण्यासाठी शासनाकडून सुमारे 16 कोटी रुपयांचा भरीव निधी मंजूर असून त्यातून सुरू असलेल्या प्रकल्पाचे तब्बल 90 टक्के काम आता पूर्ण झाले आहे. महिनाभरामध्ये उर्वरित 10 टक्के काम येत्या काही दिवसांत पूर्ण होणार असल्याचे सांगण्यात आले.
पानवल धरणाचे काम पूर्ण झाल्यानंतर यावर्षीपासून पाणीसाठा होणार आहे. त्यामुळे पावसाळ्यानंतर धरण पूर्ण भरल्यावर जवळपास 10 टीएमसी पाणी साठा उपयोगात येणार आहे. या जुन्या धरणाला लागलेल्या गळतीमुळे फक्त दोन टीएमसीच पाणी शहरासाठी वापरात येत होते. गळतीमुळे डिसेंबर-जानेवारीमध्येच धरण तळ गाठत असे. त्यामुळे नवीन धरणामुळे आता पाण्याचा अधिकाधिक वापर होणार आहे त्यामुळे आगामी काळात रत्नागिरीकरांना पाणीटंचाईपासून मोठा दिलासा मिळणार आहे.
पानवल धरण हे शहराच्या पाणीपुरवठ्याचा मुख्य स्रोत आहे. मात्र, धरणाच्या भिंतींना गेलेले तडे आणि मोठ्या प्रमाणात होणारी गळती यामुळे पाणी साठवण क्षमतेवर गंभीर परिणाम झाला होता. ही गळती थांबवण्यासाठी आणि धरणाचे आयुष्य वाढवण्यासाठी 16 कोटी रुपयांच्या विशेष निधीतून हे दुरुस्तीचे काम हाती घेण्यात आले. प्रत्यक्ष कामाला सुरुवात झाल्यानंतर तांत्रिक आव्हाने पार करत प्रशासनाने हे काम 90 टक्क्यांपर्यंत यशस्वीपणे पूर्ण केले आहे. या कामामुळे प्रामुख्याने धरणाच्या मुख्य भिंतीचे ग्राउटिंग करून गळती रोखणे, सांडव्याची डागडुजी करणे आणि धरण क्षेत्रातील गाळ काढून साठवण क्षमता वाढवणे या बाबींचा समावेश आहे. 16 कोटी रुपयांचा हा प्रकल्प तांत्रिकदृष्ट्या अत्यंत महत्त्वाचा होता, कारण गळतीमुळे दरवर्षी लाखो लिटर पाणी वाया जात होते. आता गळती पूर्णपणे थांबल्यामुळे धरणाची पाणी साठवण्याची क्षमता पूर्ववत झाली आहे.सद्यस्थितीत धरणाची मुख्य भिंत सुरक्षित करण्यात आली असून, आता केवळ गेट्सची किरकोळ दुरुस्ती आणि शेवटच्या टप्प्यातील सुशोभीकरण अशी 10 टक्के कामे शिल्लक आहेत. 90 टक्के काम पूर्ण झाल्यामुळे यंदाच्या पावसाळ्यात धरणात पूर्ण क्षमतेने पाणी साठा करणे शक्य होणार आहे. याचा थेट फायदा रत्नागिरी शहरातील उंचावर असलेल्या भागांना आणि उपनगरांना होणार असून, उन्हाळ्यातील पाणी कपातीचे संकट मोठ्या प्रमाणात टळणार आहे.
नगरपालिका प्रशासनाने या कामावर विशेष लक्ष केंद्रित केले असून, पावसाळा सुरू होण्यापूर्वी उर्वरित 10 टक्के काम पूर्ण करण्याचे नियोजन आहे. 16 कोटी रुपये खर्च करून होत असलेल्या या कामामुळे शहराच्या पाणीपुरवठ्याची दीर्घकालीन चिंता मिटली आहे. प्रशासनाच्या या वेगवान कामाबद्दल आणि मोठ्या निधीच्या योग्य विनियोगाबद्दल नागरिकांमधून समाधान व्यक्त होत आहे.
या धरणातून ग्रॅव्हीटीने शहराला पाणी पुरवठा होत असल्याने, वीज बील शुन्य येते. सध्या नवीन पाईप लाईनचे 13 किमीचे काम जवळपास पूर्ण होत आले आहे. फक्त पोमेंडी बाणेवाडी आणि महालक्ष्मी मंदिराजवळील डोंगरात दोन टप्प्यातील जवळपास तेराशे मीटरची पाईपलाईन शिल्लक असून हे कामही अन्वी कंन्स्ट्रक्शनच्या माध्यमातून लवकरच पूर्ण सुरु केले जाणार आहे
