गणपतीपुळे:- गणपतीपुळे येथे देवदर्शनासाठी आणि पर्यटनासाठी आलेल्या कोल्हापूरमधील एका व्यक्तीचा वॉटर स्पोर्ट्स करताना समुद्रात बुडून मृत्यू झाला. सुरेश जेठानंद जेवरानी (वय ४९, रा. ताराबाई पार्क, कापसेमाळ, जि. कोल्हापूर) असे दुर्घटनेत मृत्युमुखी पडलेल्या पर्यटकाचे नाव आहे. ही दुर्दैवी घटना दि. २४ एप्रिल २०२५ रोजी सायंकाळी ५.४५ वाजता घडली.
पोलिसांनी दिलेल्या माहितीनुसार, सुरेश जेवरानी हे त्यांच्या कुटुंबीयांसोबत गणपतीपुळे येथे आले होते. ते, त्यांची पत्नी आणि आई समुद्रकिनारी बसले असताना सुरेश जेवरानी यांनी एकटेच लाईफ जॅकेट घालून ड्रॅगन राईड या वॉटर स्पोर्ट्समध्ये सहभाग घेतला. समुद्रात असताना पाण्याची मोठी लाट त्यांच्या ड्रॅगनला धडकली, त्यामुळे त्यांचा ड्रॅगनवरीलचा हात सुटला आणि ते पाण्यात पडले.
तेथील जीवरक्षकांनी त्यांना तातडीने समुद्रातून बाहेर काढले आणि उपचारासाठी मालगुंड येथील प्राथमिक आरोग्य केंद्रात दाखल केले. मात्र, डॉक्टरांनी तपासणी करून त्यांना मृत घोषित केले.
या घटनेची नोंद जयगड पोलीस ठाण्यात आमृ. क्रमांक ११/२०२५ भारतीय न्याय सुरक्षा संहिता (बी.एन.एस.एस.) १९४ प्रमाणे करण्यात आली आहे. ही नोंद दि. २४ एप्रिल २०२५ रोजी रात्री १०.२७ वाजता झाली. पोलीस या घटनेचा अधिक तपास करत आहेत.
