चालकाचे नियंत्रण सुटल्याने चार प्रवासी जखमी
गुहागर:- तालुक्यातील कुडली येथे मुक्कामी असलेली कुडली ते चिपळूण ही एसटी बस बुधवारी सकाळी शीर भाटले येथील आंबेकरवाडी परिसरामध्ये अचानक अपघातग्रस्त झाली. धावत्या बसचा स्टेअरिंग रॉड अचानक तुटल्यामुळे चालकाचा वाहनावरील ताबा सुटला आणि हा अपघात घडल्याची प्राथमिक माहिती समोर आली आहे. या अपघातामध्ये बसमधील चार प्रवाशांना किरकोळ दुखापत झाली असून मोठी जीवितहानी टळल्याने सर्वांनीच सुटकेचा निश्वास सोडला आहे.
सकाळच्या वेळी सुटणाऱ्या या नियमित बसमधून व्यापारी, नोकरदार वर्ग तसेच शाळकरी विद्यार्थी मोठ्या संख्येने प्रवास करत होते. आंबेकरवाडी परिसरामध्ये बस पोहोचली असता अचानक स्टेअरिंग रॉड निकामी झाल्याने काही क्षणांत चालकाचे नियंत्रण सुटले आणि प्रवाशांमध्ये एकच घबराट पसरली. अपघाताची माहिती मिळताच परिसरातील नागरिकांनी तत्काळ घटनास्थळी धाव घेऊन जखमी प्रवाशांना बाहेर काढत मदतकार्य केले. सुदैवाने प्रसंगावधान राखल्यामुळे मोठा अनर्थ टळला.
अपघाताची माहिती मिळताच एसटी महामंडळाचे अधिकारी आणि स्थानिक पोलिसांनी घटनास्थळी भेट देऊन पाहणी केली आहे. हा अपघात नेमका कशामुळे झाला आणि बसच्या तांत्रिक देखभालीमध्ये काही त्रुटी होती का, या दिशेने प्रशासनाकडून चौकशी सुरू करण्यात आली असून तपासणीनंतरच नेमके कारण स्पष्ट होणार असल्याचे सांगण्यात आले. मात्र, गुहागर तालुक्यामध्ये गेल्या अवघ्या आठ दिवसांतील एसटी बसचा हा दुसरा अपघात असल्याने प्रवाशांच्या सुरक्षेबाबत तीव्र चिंता व्यक्त केली जात आहे. ग्रामीण भागात सोडल्या जाणाऱ्या जुनाट आणि नादुरुस्त बसेसच्या नियमित तांत्रिक तपासणीबाबत एसटी प्रशासन कमालीचे दुर्लक्ष करत असल्याचा आरोप प्रवाशांमधून केला जात असून, प्रवाशांचा जीव धोक्यात न घालता गाड्यांची नियमित आणि काटेकोर देखभाल करावी, अशी आग्रही मागणी आता जोर धरू लागली आहे.
