चिपळूण:- शहरातील पेठमाप येथील एन्रॉन पुलानजीकच्या झाडावर आंबे काढण्यासाठी चढलेल्या तरुणाला विद्युत तारेचा झटका लागून जागीच मृत्यू झाल्याची घटना गुरुवारी सायंकाळी ५.३० वाजता घडली. याबाबत येथील पोलीस स्थानकात या घटनेची आकस्मिक मृत्यू म्हणून नोंद झाली आहे.
अल्ताफ सलीम सुर्वे (२३, सध्या रा. गोवळकोट रोड, पलोजी बाग, मूळचा आंध्रप्रदेश) असे मृत्यू झालेल्या तरुणाचे नाव आहे. तो गुरुवारी दुपारनंतर घराबाहेर पडला होता. त्यानंतर पेठमाप परिसरातील विद्युत पुरवठा अचानक खंडित झाला. त्यामुळे नेमका विद्युत पुरवठा कशामुळे बंद पडला त्याचा शोध महावितरणच्या कर्मचाऱ्यांमार्फत घेतला जात असताना एका तरुणाचा मृतदेह झाडावर लटकलेल्या स्थितीत आढळून आला. त्यानंतर काही वेळाने मृत अल्ताफ सुर्वे याची ओळख पटली.
