रत्नागिरी:- नगर परिषदेच्या मालकीचे अनेक इमारतींमध्ये रिकामे गाळे आहेत. कोणतीही परवानगी न घेता किंवा भाडे न भरता परस्पर शटर उघडून काही जणांकडून गाळे वापरले जात असल्याचे मालमत्ता विभागाला आढळून आले आहे. त्यामुळे मालमत्ता विभागाने आता अशा गाळ्यांचे शटर दुरूस्ती करून घेण्याचे नियोजन केले आहे. त्याचबरोबर पोलिस कारवाई करण्याचाही विचार सुरू आहे.
रत्नागिरी नगर परिषदेच्या मालकीच्या अनेक इमारती आहेत. भाजी मार्केट, मच्छी मार्केट, व्यापारी संकुल अशा स्वरूपातील इमारती असून, त्यामध्ये अनेक गाळे रिकामे आहेत. त्रिसदस्यीय समितीच्या निर्णयानुसार ठरलेली प्रिमियम रक्कम आणि भाडे परवडणारे नसल्याने अनेक गाळे तसेच पडून आहेत.
अनेक वर्षांपासून रिकामे असलेल्या या गाळ्यांचे शटर तुटलेले आहेत. याकडे नगर परिषद लक्ष देत नसल्याचे लक्षात आल्यानंतर अनेकांनी हे गाळे परस्पर वापरण्यास सुरूवात केली. हा प्रकार आता नगर परिषदेच्या निदर्शनास आला आहे. त्यामुळे मोक्याच्या ठिकाणच्या गाळ्यांचे शटर बदलले जात आहेत. त्याचबरोबर जे कोणी अतिक्रमण करून गाळे वापरत आहेत त्यांच्याविरूद्ध पोलिसांकडे तक्रार करण्याबाबत निर्णय घेण्याबाबत विचार सुरू झाला आहे.
