पाणी समिती सभापती निमेश नायर यांची माहिती
रत्नागिरी:- रत्नागिरी शहराच्या पाणीपुरवठा नियोजनात महत्त्वाचा बदल करण्यात आला असून, आज सोमवार, १६ नोव्हेंबरपासून पुढील प्रत्येक सोमवारी रत्नागिरी शहराचा पाणीपुरवठा पूर्णपणे बंद राहणार आहे. दिवाळी सणानिमित्त नागरिकांची गैरसोय होऊ नये म्हणून गेल्या सोमवारी (९ नोव्हेंबर) शहराला नियमित पाणीपुरवठा करण्यात आला होता; मात्र सणासुदीचा काळ संपल्याने आता पुन्हा एकदा दर सोमवारी पाणीपुरवठा बंद ठेवण्याचे धोरण पूर्ववत लागू करण्यात आल्याची माहिती पाणी समितीचे सभापती निमेश नायर यांनी दिली आहे.
पाणीसाठ्याचे योग्य नियोजन रत्नागिरी शहरातील पाणीसाठ्याचे योग्य व दीर्घकालीन नियोजन करण्यासाठी प्रशासनाने गत १२ ऑक्टोबरपासून प्रत्येक सोमवारी शहराचा पाणीपुरवठा बंद ठेवण्याचा महत्त्वपूर्ण निर्णय घेतला होता. या निर्णयाची अंमलबजावणी सुरू असतानाच, दिवाळी सणाचे औचित्य साधून ९ नोव्हेंबर रोजी आलेल्या सोमवारी नागरिकांच्या सोयीसाठी पाणीपुरवठा सुरू ठेवण्यात आला होता. परंतु, आता सण संपल्यामुळे आगामी काळातील पाण्याची गरज लक्षात घेता हा निर्बंध पुन्हा लागू करण्यात आला आहे.
शीळ धरणातील सद्यस्थिती रत्नागिरी शहराला पाणीपुरवठा करणाऱ्या शीळ धरणातील पाणीसाठ्याची स्थिती डोळ्यांसमोर ठेवून हा निर्णय कायम ठेवण्यात आला आहे. १२ ऑक्टोबर रोजी जेव्हा हा निर्णय घेण्यात आला, त्यावेळी शीळ धरणात ९९.७३ टक्के इतका भरलेला पाणीसाठा शिल्लक होता.
दरम्यान, काही आठवड्यांपूर्वी झालेल्या परतीच्या पावसामुळे शीळ धरणातील पाणीसाठ्यात ०.०४ दशलक्ष घनमीटरने भर पडली होती. धरणातील या वाढीव साठ्यामुळे दिवाळीच्या सोमवारी केलेल्या विशेष पाणीपुरवठ्याचा धरणातील एकूण जलसाठ्यावर फारसा नकारात्मक परिणाम झाला नाही. असे असले तरी, भविष्यातील संभाव्य पाणीटंचाई टाळण्यासाठी आणि उपलब्ध जलसाठ्याचा समतोल राखण्यासाठी प्रशासनाने हा सावधगिरीचा उपाय कायम ठेवला आहे.
रत्नागिरी नगरपरिषद प्रशासनाकडून सर्व नागरिकांना पाण्याचा अत्यंत सराव व काटकसरीने वापर करण्याचे आवाहन करण्यात आले आहे.









