दापोली तालुक्यातील हर्णे येथील घटना
दापोली:- दापोली तालुक्यातील हर्णे परिसरात उसन्या पैशाच्या वादातून एका व्यापाऱ्याला शिवीगाळ करून काठीने मारहाण केल्याची घटना समोर आली आहे. १८ ऑक्टोबर रोजी सायंकाळी साडेसात वाजण्याच्या सुमारास ही घटना घडली असून, दापोली पोलिसांनी आरोपीविरुद्ध भारतीय न्याय संहिता अधिनियम २०२३ च्या संबंधित कलमांनुसार गुन्हा दाखल केला आहे.
याप्रकरणी दिपक अशोक खेडेकर (वय ५० वर्षे, व्यवसाय व्यापार, रा. हर्णे, जुनी ब्राम्हणआळी, ता. दापोली, जि. रत्नागिरी) यांनी दापोली पोलीस ठाण्यात फिर्याद दिली आहे. त्यांच्या फिर्यादीनुसार, घटनेच्या दिवशी म्हणजे १८ ऑक्टोबर रोजी सायंकाळी ७:०० वाजण्याच्या सुमारास फिर्यादी दिपक खेडेकर हे आरोपी भरत चुनेकर (पूर्ण नाव माहीत नाही, रा. पाजपंढरी, ता. दापोली) याच्या घरी पाजपंढरी येथे गेले होते. त्यांनी भरत चुनेकर याच्याकडे त्याला पूर्वी उसने दिलेले पैसे परत मागितले.
मात्र, फिर्यादीने पैशाची मागणी केल्याचा राग मनात धरून आरोपी भरत चुनेकर याने दिपक खेडेकर यांना शिवीगाळ करण्यास सुरुवात केली. “भडव्या, येथून चालू पड” असे अश्लील बोलून त्याने दमदाटी केली आणि घरातून काठी उचलून खेडेकर यांच्यावर हल्ला चढवला. आरोपीने हातातील काठीने फिर्यादीच्या उजव्या हाताचे मनगट आणि डाव्या मांडीवर मारहाण केली, ज्यामुळे त्यांना दुखापत झाली. या घटनेनंतर दिपक खेडेकर यांनी १९ ऑक्टोबर रोजी रात्री १२:५६ वाजता दापोली पोलीस ठाण्यात धाव घेऊन तक्रार नोंदवली. दापोली पोलिसांनी याप्रकरणी गु.आर. क्र. १९०/२०२५ अन्वये भारतीय न्याय संहिता अधिनियम २०२३ चे कलम ११८(१), ३५२ आणि ३५१(२) प्रमाणे आरोपी भरत चुनेकर याच्याविरुद्ध गुन्हा दाखल केला असून, पुढील तपास सुरू आहे.
