कुंभवे शाळेजवळ बर्निंग कारचा थरार

दापोली:- दापोली-खेड मार्गावर कुंभवे येथे आज सकाळी एक धक्कादायक घटना घडली. नफिज मुकादम यांच्या मालकीची कार कुंभवे शाळेजवळून जात असताना कारने अचानक पेट घेतला. काही क्षणांतच गाडीला मोठ्या प्रमाणावर ज्वाळा भडकल्या आणि वाहन पूर्णपणे जळून खाक झाले.

सुदैवाने या घटनेत कोणतीही जीवितहानी झाली नाही. गाडीमध्ये प्रवास करणारे सर्वजण वेळेत बाहेर पडल्याने मोठा अनर्थ टळला. घटनेनंतर परिसरात एकच खळबळ उडाली. स्थानिक नागरिकांनी तत्काळ घटनास्थळी धाव घेत आग विझवण्याचा प्रयत्न केला. दरम्यान, अग्निशमन दलालाही तातडीने पाचारण करण्यात आले आणि त्यांनी आग नियंत्रणात आणली. अचानक लागलेल्या या आगीचे नेमके कारण अद्याप समजू शकलेले नाही. प्राथमिक अंदाजानुसार गाडीतील तांत्रिक बिघाडामुळे ही आग लागली असावी, असा अंदाज व्यक्त केला जात आहे. पोलिसांनी घटनास्थळी पाहणी करून पंचनामा केला असून पुढील तपास सुरू आहे.

या घटनेनंतर नागरिकांमध्ये कारमधील सुरक्षिततेच्या बाबतीत पुन्हा एकदा प्रश्नचिन्ह उपस्थित झाले आहे. दरम्यान, नफिज मुकादम यांची ही कार पूर्णपणे जळून खाक झाल्याने मोठे आर्थिक नुकसान झाल्याचे सांगितले जात आहे.