सहाजणांवर गुन्हा दाखल
रत्नागिरी:- शहरानजीकच्या कारवांचीवाडी आदिशक्तीनगर येथील बनावट खरेदीखत तयार करून १७.९० गुंठे जागेचे विक्री केल्याचा धक्कादायक प्रकार उघड झाला आहे. याप्रकरणी सहा संशयितांविरुद्ध रत्नागिरी ग्रामीण पोलिस ठाण्यात गुन्हा दाखल करण्यात आला आहे. संशयितांनी खरेदीखतावर खोटी स्वाक्षरी व दुसऱ्याच व्यक्तीचा फोटो वापरून दुय्यम निबंधक कार्यालयाचीही फसवणूक केल्याचे तक्रारीत म्हटले आहे.
चंद्रकांत वासू कांबळे (वय ६२, रा कारवांचीवाडी, पोमेंडी बुद्रुक रत्नागिरी) यांनी ग्रामीण पोलिस ठाण्यात तक्रार दाखल केली आहे. याप्रकरणी संगीता चंद्रकांत घाणेकर (रा. डफळचोळवाडी खेडशी, रत्नागिरी), सुवर्णा रघुनाथ कळंबटे (रा. मिरजोळे, लक्ष्मीकांतवाडी रत्नागिरी), सुप्रिया संजय कोत्रे (रा. भाटलेवाडी कापडगाव रत्नागिरी), संतोष वासुदेव कांबळे (रा. कारवांचीवाडी रत्नागिरी), सुरेश वासुदेव कांबळे (रा. कारवांचीवाडी रत्नागिरी), अशोक विठ्ठल घवाळी (रा. पानवल, रत्नागिरी) या संशयितांविरुद्ध गुन्हा दाखल करण्यात आल्याचे पोलिसांनी सांगितले.
पोलिसांनी दिलेली माहिती, चंद्रकांत कांबळे व संशयित यांची कारवांचीवाडी आदिशक्तीनगर येथे १७.९० गुंठे सामायिक वर्ग एकची जमीन आहे. २०२३ मध्ये संशयित संतोष व सुरेश यांनी तक्रारदार यांना आपण या जमिनीची विक्री करूया, असे सांगितले होते. त्यावेळी तुम्ही गि-हाईक घेऊन या. समोरासमोर बोलणी करू, असे सांगितले होते. यानंतर फेब्रुवारी २०२५ ला तक्रारदार हे सातबारा काढण्यासाठी पोमेंडी बुद्रुक कार्यालयात गेले असता त्यांच्या जागेची विक्री झाल्याचा धक्कादायक प्रकार पुढे आला, त्याचे खरेदीखतदेखील केले असल्याचे सांगितले. तक्रारदार चंद्रकांत कांबळे यांनी यासंबंधी अधिक माहिती जाणून घेण्यासाठी तहसील कार्यालयात धाव घेतली. या ठिकाणी त्यांनी खरेदीखताची छायांकित प्रत मागून घेतली. त्यावेळी त्यांना संशयितांनी सामायिक प्रतिज्ञापत्र केल्याचे दिसून आले. त्यामध्ये तक्रारदार यांचे नाव हाती लिहिण्यात आले होते, तसेच दुसऱ्याच पुरुषाचा फोटो लावून त्यावर तक्रारदार यांचा अंगठा व बनावट सही केल्याचे दिसून आले. तसेच दुय्यम निबंधक कार्यालय येथे तयार करण्यात आलेल्या खरेदीखतावर तक्रारदार यांच्या नावासमोर दुसऱ्याच व्यक्तीचा फोटो लावून त्यावर सही व अंगठा घेतला आणि आपल्या जागेची विक्री केली, अशी तक्रार चंद्रकांत कांबळे यांनी ग्रामीण पोलिसांत केली आहे. याप्रकरणी ग्रामीण पोलिसांनी संशयितांविरुद्ध गुन्हा दाखल केला आहे.
