रत्नागिरी:- रत्नागिरीच्या समुद्रकिनार्यालगत चिनी नौका आढळल्याचा संदेश आल्यानंतर मत्स्य विभागासह पोलिस, तटरक्षक दलाच्या यंत्रणा अलर्ट झाली. तपासाअंती सोशल मीडियावर आलेले फोटो आणि व्हीडीओ पाचशे नॉटीकल मैलाच्या बाहेरील असल्याची खात्री झाली. त्यामुळे सर्वच यंत्रणांनी निःश्वास सोडला. या गोंधळात सलग दोन दिवस सागरी सुरक्षा विभागासह मत्स्य विभागाच्या पथकांनी जिल्हा हद्दीतील 12 नॉटीकल मैलाची किनारपट्टी पिंजून काढली होती.
मच्छीमारांकडून 15 फेबु्रवारी 2024 ला चीन देशाच्या मच्छीमारी नौका रत्नागिरी समुद्रात असल्याची माहिती सोशल मीडियाच्या माध्यमातून पुढे आली. ही माहिती रत्नागिरीतील मत्स्य विभागाच्या अधिकार्यांपर्यंत पोचली. त्यानंतर तत्काळ मत्स्य विभागाच्या दोन परवाना अधिकार्यांना सागरी सुरक्षेचे चार पोलिस अंमलदारांसह सुरक्षा बोटीमधून पाठविण्यात आले होते. चीनची नौका आढळल्याचा संदेश मिळाल्यानंतर शुक्रवारी (ता. 16) सायंकाळपासून मत्स्य विभागाच्या अधिकार्यांनी पोलिसांसह देवगडपर्यंत संपुर्ण समुद्रकिनारा तपासला. मात्र मिळालेल्या फोटोतील एकही चीनी नौका सापडली नाही. याबाबत पोलिसांसह तटरक्षक दलाकडूनही शोध मोहीम राबविण्यात आली. कसून तपासणी केल्यानंतरही समुद्रात कोठेच नौका सापडल्या नाहीत. मत्स्य विभागाच्या अधिकार्यांनी युटीएसवरही नौकांची चाचपणी केली. मात्र त्यावरही कोणते लोकेशन आढळले नाही. चिनी बोटींच्या संदेशामुळे संपुर्ण यंत्रणा सतर्क झाल्या होत्या. सांगितलेल्या लोकेशनवर परदेशातील एक नौका होती. याबाबत कसून तपासणी केल्यानंतर मच्छीमारांकडून पाठविण्यात आलेले फोटो व व्हीडीओ हे आंतरराष्ट्रीय हद्दीतील असल्याचे प्रथमदर्शन आढळून आले. चिनी नौकांमुळे सतर्क झालेल्या सर्वच यंत्रणांनी निःश्वास सोडला.
