रत्नागिरी:- मच्छीमारांच्या जाळ्यात मागील तीन दिवस बंपर कानट मासा मिळत आहे. तीन ते चार टन मासा जाळ्यात सापडत असल्याने मच्छीमार सुखावले आहेत. हा मासा फिशमिल कंपन्यांना प्रकिया करण्यासाठी विकला जातो. बंपर मासा मिळाल्याने कंपन्यांना काही काळ खरेदी थांबवावी लागली. अल्पावधीतच खरेदी पुन्हा सुरु झाली. पुरवठा वाढल्याने दरावरही परिणाम झाल्याचे मच्छीमारांकडून सांगण्यात आले.
ऑगस्ट महिन्यात ट्रॉलिंग, गिलनेटद्वारे मासेमारीला आरंभ झाला. त्यानंतर महिन्याभरात शासनाच्या निर्देशानुसार पर्ससिननेट मासेमारीला सुरु झाल्यानंतर आरंभीलाच किनार्यापासून 20 ते 22 वाव खोल समुद्रात जाळ्यात कानट मासा मिळू लागला आहे. दरवर्षी सुरवातीच्या कालावधीत हा मासा मिळतो. साधारपणे 4 सप्टेंबरपासून हा मासा सापडण्यास सुरवात झाली. सलग तिन दिवस नौकांना मासा मिळत होता. फिशमिल कंपन्यांमध्ये सुरवातीला किलोला 22 रुपये दर मिळाला होता. पुरवठा वाढल्यामुळे हा दर निम्म्यावर आला आहे. सध्या दहा ते बारा रुपये किलोने फिशमिल कंपनीत विकत घेतला जात असल्याचे मच्छीमारांकडून सांगण्यात आले. या माशांवर प्रक्रिया करुन त्यापासून बनवलेले ऑईल किंवा पावडर निर्यात केले जाते. परदेशात त्याचा विविध उत्पादनांमध्ये वापर केला जातो.
दरम्यान, फिशमिल कंपन्यांच्या क्षमतेपेक्षा अधिक मासा प्रक्रियेसाठी येऊ लागला. त्यानंतर काही कालावधीतच कंपन्यांनी खरेदी बंद केली होती. तिन दिवसानंतर कानट मिळण्याचा ओघ कमी झाला आहे. सध्या पाचशे ते हजार किलोपर्यंतच मासा मिळत आहे. त्यामुळे कंपन्यांची खरेदीही सुरु झाली आहे.
किनारी भागात हलके वारे
बंगालच्या उपसागरात कमी दाबाचा पट्टा निर्माण झाल्यामुळे त्याचे परिणाम किनारी भागात जाणवत होते. गुरुवारी (ता. 7) सायंकाळी हलके वारे वाहू लागले होते. खोल समुद्रातही वार्यांचे परिणाम जाणवू लागल्यामुळे मासेमारीसाठी गेलेले काही मच्छीमारांनी माघारी परतणे पसंत केले.
