खेड:- तालुक्यातील कुडोशी खापरेवाडी येथून तीन दिवसांपासून बेपत्ता असलेल्या ४८ वर्षीय व्यक्तीचा मृतदेह जगबुडी नदीपात्रात आढळून आला आहे. या घटनेमुळे परिसरात हळहळ व्यक्त केली जात आहे.
काशीनाथ रामचंद्र झोरे (वय ४८ वर्षे, रा. कुडोशी खापरेवाडी, ता. खेड) असे मृत व्यक्तीचे नाव आहे. काशीनाथ हे मंगळवार, २० जानेवारी रोजी संध्याकाळी ७ वाजेच्या सुमारास घरातून बाहेर पडले होते. मात्र, दीर्घकाळ लोटूनही ते घरी परतले नाहीत. नातेवाईकांनी सर्वत्र शोध घेऊनही ते न सापडल्याने, त्यांची पत्नी मनीषा काशीनाथ झोरे यांनी खेड पोलीस ठाण्यात ते बेपत्ता असल्याची तक्रार दिली होती. त्यानुसार पोलिसांनी नोंद केली होती.
शुक्रवार, २३ जानेवारी रोजी सकाळी ७ वाजेच्या सुमारास कुडोशी गवळटेप येथील जगबुडी नदीपात्रात एक मृतदेह तरंगताना स्थानिकांना दिसला. याबाबतची माहिती मिळताच पोलिसांनी घटनास्थळी धाव घेतली. तो मृतदेह बेपत्ता असलेल्या काशीनाथ झोरे यांचाच असल्याची ओळख पटली आहे.
खेड पोलिसांनी याप्रकरणी बी.एन.एस.एस. कलम १९४ अन्वये आकस्मिक मृत्यूची (एडीआर) नोंद केली आहे. काशीनाथ यांचा मृत्यू नक्की कसा झाला, याचा अधिक तपास खेड पोलीस करत आहेत.
