दापोली:- दापोली ते खेड या मार्गावर असलेल्या हिल टॉप परिसरात गुरुवारी सकाळी सुमारास एक बोलेरो गाडी अपघातग्रस्त झाली. सदर गाडी ही बांधकामासाठी लागणारे साहित्य घेऊन खेडकडे जात होती. उतारावरून जात असताना गाडीचे ब्रेक फेल झाल्याची शक्यता वर्तवण्यात येत असून त्यामुळे गाडी स्लीप होऊन थेट रस्त्यालगत असलेल्या शेतामध्ये जाऊन आदळली.
अपघात इतका गंभीर होता की गाडीचे पुढचे भाग पूर्णतः नुकसानग्रस्त झाले. मात्र, सुदैवाने चालकासह कोणत्याही व्यक्तीला गंभीर इजा झाली नाही. गाडीत चालक एकटाच होता आणि वेळीच झालेल्या प्रतिसादामुळे कोणतीही जीवितहानी टळली.
अपघाताची माहिती मिळताच स्थानिक ग्रामस्थांनी तत्काळ घटनास्थळी धाव घेत मदतकार्य सुरू केले. काही वेळ वाहतूक विस्कळीत झाली होती, मात्र पोलिसांनी घटनास्थळी येऊन वाहतूक सुरळीत केली. या घटनेची नोंद संबंधित पोलिस ठाण्यात करण्यात आली आहे.
दरम्यान, या मार्गावर अनेकदा अपघाताच्या घटना घडत असून, उतार आणि वळणावळणाच्या रस्त्यामुळे वाहनचालकांसाठी हा रस्ता धोकादायक ठरत आहे. त्यामुळे प्रशासनाने या मार्गावर अपघात रोखण्यासाठी अतिरिक्त उपाययोजना कराव्यात, अशी मागणी स्थानिकांकडून करण्यात येत आहे.
