चार नगरपरिषदा, तीन नगरपंचायतींच्या मतमोजणीसाठी प्रशासन सज्ज

रत्नागिरी:- रत्नागिरी जिल्ह्यातील चार नगरपरिषदा आणि 3 नगरपंचायतींच्या निवडणुक मतमोजणीच्या पार्श्वभूमीवर प्रशासनस्तरावरून सुरक्षा व्यवस्थेची कडेकोट तयारी करण्यात आली आहे. मतपेटय़ा ठेवण्यात आलेल्या ‘स्ट्रॉंग रूम‘मध्ये एसआरपी आणि पोलिसांचा कडेकोट बंदोबस्त तैनात आहे. तसेच, सीसीटीव्ही कॅमेरे, अग्निशमन यंत्रणा आणि स्ट्रक्चरल ऑडिटसह सर्व सुरक्षा उपाययोजना पूर्ण करण्यात आल्या आहेत. 21 डिसेंबर रोजी जिल्हय़ातील नगर परिषदा आणि नगर पंचायतीच्या निवडणूकीच्या त्या त्या ठिकाणी मतमोजणीला सकाळी 10 वाजल्यापासून प्रारंभ होणार असल्याचे जिल्हाधिकारी मनुज जिंदल यांनी पत्रकार परिषदेत सांगितले.

रविवारी, 21 डिसेंबर रोजी सकाळी 10 वाजल्यापासून मतमोजणीला सुरुवात होणार आहे. प्रशासनाने यासाठी जय्यत तयारी केली आहे. प्रत्येक शहरासाठी मतमोजणीची ठिकाणे आणि टेबलांची संख्या निश्चित करण्यात आली आहेत. जिल्ह्यातील सात नगरपरिषदा आणि नगरपंचायतींच्या संपूर्ण जिल्ह्यात सरासरी 68.14 टक्के मतदान झाले आहे. एकूण 1 लाख 60 हजार 468 मतदारांपैकी 1 लाख 9 हजार 426 मतदारांनी मतदानाचा हक्क बजावला. विशेष म्हणजे, या निवडणुकीत महिला मतदारांचा सहभाग पुरुषांच्या तुलनेत अधिक राहिला आहे. मात्र जिल्ह्यात झालेल्या मतदानामध्ये लक्षणीय फरक दिसून आला. गुहागर नगरपंचायतीमध्ये सर्वाधिक, म्हणजेच 75.26 टक्के इतके मतदान झाले, तर राजापूर नगरपंचायतीमध्ये 74.55 टक्के मतदान नोंदवले गेले. याउलट, रत्नागिरी शहरात सर्वात कमी, म्हणजे केवळ 55.09 टक्के मतदान झाले आहे. दरम्यान, रत्नागिरी नगरपरिषदेतील प्रभाग क्रमांक 10 मधील मतदान न्यायालयीन अपिलामुळे लांबणीवर पडले असून, ते 20 डिसेंबर रोजी चार केंद्रांवर घेतले जाणार आहे. त्यानंतर 21 डिसेंबर रोजी संपूर्ण जिल्हय़ातील नगर परिषदा आणि नगर पंचायतीच्या झालेल्या निवडणूका निकाल प्रक्रिया घेतली जाणार आहे. जिल्हाधिकारी मनुज जिंदल यांनी नागरिकांना या संपूर्ण प्रक्रियेत पोलीस आणि जिल्हा प्रशासनाच्या अधिकार्‍यांना सहकार्य करण्याचे आवाहन केले आहे.

–मतमोजणीचे ठिकाण आणि नियोजन
–रत्नागिरी : नगरपरिषद कार्यालय संत गाडगेबाबा सभागृहात – 16 टेबल.
–चिपळूण् :युनायटेड इंग्लिश स्कूलमधील गुरुदक्षिणा सभागृहात -14 टेबल.
–खेड :नगर परिषद कार्यालय सभागृह, 5 टेबल.
–राजापूर :नगर परिषद सभागृह- 5 टेबल.
–लांजा :तहसिलदार कार्यालय सभागृह-7 टेबल.
–देवरुख :नगरपांयत सभागृह – 9 टेबल.
–गुहागर : श्री.दे.गो.कृ.मा.विद्यालय सभागृह- 6 टेबल.
-निवडणूक निर्णय अधिकाऱ्यांमार्फत निकाल प्रसिध्द केला जाणार.