33 लाखांचा मुद्देमाल जप्त
खेड:- खेड पोलीस स्टेशन हद्दीतील 59 लाखांच्या दरोडा प्रकरणी मुख्य आरोपीसह त्याच्या 2 साथीदारांना स्थानिक गुन्हे अन्वेषण शाखेच्या पोलिसांनी थरारक पाठलाग करून पकडले. यावेळी 33 लाखाचा मुद्देमाल जप्त करण्यात आला.
16 सप्टेंबर रोजी 2 किलो सोन्याचा व्यवहार करण्याच्या उद्देशाने कामाक्षी पेट्रोलपंपाच्या अलिकडे असणारे कच्च्या डांबरी रोडने कॅनॉलजवळ घेवून जावून आरोपी व त्याच्या साथीदारांनी लाथाबुक्क्यांनी मारहाण करुन चाकू व सु-याचा धाक दाखवून फिर्यादीकडे असलेले 59 लाख रुपये रोख रक्कम असलेली बॅग हिसकावून नेली होती. या प्रकरणी खेड पोलीस ठाणे येथे गुन्हा दाखल करण्यात आलेला होता.
सदर गुन्हयामध्ये आतापर्यंत एकुण 9 आरोपी अटक करण्यात आलेले होते. मात्र मुख्य सुत्रधार व त्याचे दोन साथीदार गुन्हयातील रक्कमेसह फरार होते. सदर गुन्हयाच्या अनुषंगाने पोलीस अधीक्षक डॉ. गर्ग, अपर पोलीस अधीक्षक विशाल गायकवाड यांचे मार्गदर्शनाखाली स्थानिक गुन्हे अन्वेषण शाखेचे पथक सातारा, पुणे, कोल्हापूर, बेळगाव राज्य कर्नाटक या ठिकाणी आरोपीच्या शोधकामी कार्यरत होते.
1 ऑक्टोबर रोजी आरोपीत हा त्याचेकडील कारने गोव्याला जाणार असल्याची खात्रीशीर माहीती सदर पथकाला मिळाल्याने त्याप्रमाणे सापळा रचण्यात आला. आरोपीचा थरारक पाठलाग करुन खेड दरोडयातील मुख्य आरोपी किशोर उर्फ पिंटया उर्फ बिहारी रघूनाथ पवार (वय 36, रा.हर्णै,ता.दापोली जि.रत्नागिरी) व त्याचे दोन साथीदार सत्यवान जनार्दन साळूंखे (वय 29, रा.सर्वे, ता.श्रीवर्धन,जि.रायगड) आणि सचिन लहू जाधव (वय 30, मूळ रा.पानशेत, ता.हवेली, जि.पूणे सध्या रा.हर्णै, ता.दापोली, जि.रत्नागिरी) यांना त्याचेकडील कारसह ताब्यात घेतले. आरोपींकडून 28 लाख 5 हजार 900 रुपयांची रोख रक्कम व कार, मोबाईल असा एकूण 33 लाख 9 हजार 440 रुपये किमंतीचा मुद्देमाल जप्त करण्यात आलेला आहे. पुढील तपास सुरु आहे.
सदरची कामगिरी स्थानिक गुन्हे शाखेचे पोलीस निरीक्षक श्री.शिरीष सासने, पोलीस उप-निरीक्षक.श्री.विकास चव्हाण, पोलीस हवालदार- संजय कांबळे, संदीप कोळंबेकर, राकेश बागुल, पोलीस नाईक- विजय आंबेकर, सागर साळवी, उत्तम सासवे, अमोल भोसले, दत्ता कांबळे, रमीज शेख, मपोहेकॉ अपूर्वा बापट यांनी केलेली आहे. तपास पथकाच्या चांगल्या कामगिरीबद्दल मा.पोलीस अधीक्षक डाॅ. मोहित कुमार गर्ग तसेच मा.अपर पोलीस अधीक्षक श्री. विशाल गायकवाड यांनी त्यांचे अभिनंदन केले आहे.
