रत्नागिरी:- आयुष्मान भारत डिजिटल मिशनचा एक भाग म्हणून भारत सरकारने डिजिटल हेल्थ कार्ड हा उपक्रम सुरू केला आहे. राज्यातील सर्व नागरिकांसाठी हे हेल्थ कार्ड आवश्यक आहे. त्यामुळे सर्व नागरिकांनी या आभा कार्डसाठी नोंदणी करावी, असे आवाहन सार्वजनिक आरोग्य विभागाने केले आहे.
रुग्णांची सर्व माहिती एकाच ठिकाणी आणि ती ही डिजिटल स्वरुपात मिळावी, म्हणून आभा कार्ड सुरु करण्यात आले आहे. सामान्यत: रुग्ण आजारी पडल्यानंतर हॉस्पीटलमध्ये कागदी फाईल दिली जाते. दरवेळी तपासणीसाठी रुग्णांना फाईल सोबत बाळगावी लागते. त्याचप्रमाणे डॉक्टरांसुध्दा मागील सर्व रिपोर्टस तपासून पाहावे लागतात. या सर्व बाबींचा विचार करता शासनाकडून आता नागरिकांना आभा आरोग्य कार्ड दिले जाणार आहे. आभा आरोग्य कार्ड म्हणजेच आयुष्मान भारत आरोग्य खाते होय.
आभा कार्ड नावाने डिजिटल स्वरुपातील हेल्थ आयडी मिळणार असून, या कार्डवर तुमचा वैद्यकीय इतिहास, चाचण्या, केलेले उपचार आदी माहिती साठविली जाणार आहे. ही सर्व माहिती डिजिटल स्वरुपात आभा कार्डवर साठवली जाणार असल्यामुळे नागरिकांना तसेच डॉक्टर, वैद्यकीय कर्मचारी यांना रुग्णांची पार्श्वभूमी म्हणजेच मागील आजार, निदान, उपचार आदींची माहिती जलद आणि सोयीस्करपणे समजण्यास मदत होणार आहे. त्यामुळे वेळेची बचत होणार आहे. आभा हेल्थ कार्डच्या मदतीने देशभरातील सर्व हॉस्पीटलमध्ये उपचार घेण्याची सुविधा उपलब्ध होणार आहे. प्रत्येक व्यक्तीसाठी युनिक हेल्थ कार्ड बनविले जाणार आहे.
