रत्नागिरी:- महाराष्ट्र राज्य ग्रामीण जीवनोन्नती अभियानांतर्गत तालुक्यातील शिरगाव येथील क्रांती महिला प्रभाग संघ, शिरगाव व आरंभ ग्रामसंघ, उन्नती ग्रामसंघ शिरगाव यांच्या नोंदवही व जमाखर्च रजिस्टर मध्ये खाडाखोड करून ११ लाख १९ हजार ९०६ रुपयांचा अपहार केल्याप्रकरणी मुग्धा शैलेश शेटये, संगीता रामदास मोरे ( दोघेही रा. शिरगाव) यांच्या विरोधात शहर पोलिस स्थानकात गुन्हा दाखल करण्यात आला आहे. या अपहाराची व्याप्ती मोठी असून पोलीस तपासात हे उघड होण्याची शक्यता आहे.
महाराष्ट्र राज्य ग्रामीण जीवनोन्नती अभियानचे तालुका अभियान व्यवस्थापक निलेश ढमाले यांनी शहर पोलिस स्थानकात दिलेल्या तक्रारीनुसार दि. १८ जुलै २०१८ ते २ जून २०२३ या कालावधीत महाराष्ट्र राज्य गÏामीण जीवनोन्नती अभियानांतर्गत रजिस्टर असलेल्या क्रांती महिला प्रभाग संघ, शिरगाव व आरंभ ग्रामसंघ, उन्नती ग्रामसंघ शिरगाव यांचे मासिक बैठक अहवाल नोंदवही व जमाखर्च नोंदवही यामध्ये खाडाखोड करुन उपरी लेखन व व्हाईट शाईचा वापर केल्याचे तपासणी मध्ये दिसून आले आहे.
प्रकरणाची अंतीम चौकशी जिल्हा अभियान सहसंचालक, जिल्हा अभियान व्यवस्थापक आणि सहाय्यक लेखाधिकारी यांनी केलेली असून त्या चौकशी अहवालावरुन जिल्हा परिषद मुख्य कार्यकारी अधिकारी यांनी या अपहार प्रकरणी क्रांती प्रभागसंघ शिरगावचे तत्कालीन व सद्यस्थितीतील सर्व पदाधिकारी, प्रभाग संघ लेखापाल तसेच कार्यरत प्रभागसंघ व्यवस्थापक श्रीम. मुग्धा शेट्ये, व तत्कालीन प्रभाग संघ अध्यक्ष श्रीमती.संगिता मोरे यांच्यावर फौजदारी कारवाई करण्याचे आदेश दिले होते. त्यानुसार तपासणी अहवालाचे अवलोकन करुन अपहार प्रकरणी क्रांती प्रभागसंघ शिरगावचे तत्कालीन व सद्यस्थितीतील सर्व पदाधिकारी, प्रभाग संघ लेखापाल तसेच कार्यरत प्रभागसंघ व्यवस्थापक श्रीम. मुग्धा शेट्ये, व द्य तत्कालीन प्रभाग संघ अध्यक्ष श्रीमती. संगिता मोरे यांनी क्रांती प्रभाग संघ, आरंभ ग्रामसंघ, उन्नती ग्राम संघ शिरगाव ता.जि.रत्नागिरी यांनी बैठक अहवाल नोंदवही व जमाखर्च नोंदवही यामध्ये खाडाखोड करुन उपरी लेखन व व्हाईट शाईचा वापर करुन तसेच ११ लाख १९ हजार ९०६ रुपये अपहार केलेला आहे.
निलेश ढमाले यांच्या तक्रारीवरुन शहर पोलीसांनी श्रीम. मुग्धा शेट्ये,श्रीमती. संगिता मोरे यांच्या विरोधात भादंविक ४२०, ४६७, ४६८,४७१, ३४ प्रमाणे गुन्हा दाखल केला आहे. अधिक तपास पोलीस उपनिरिक्षक शितल पाटील करत आहेत.
