रत्नागिरी:- जिल्हा परिषद प्राथमिक शिक्षकांच्या बदल्यांचे मेमो नुकतेच बाहेर पडले आहेत. संवर्ग १ ची यादी जाहीर झाली असून ऑनलाईन अर्ज भरलेल्या १ हजार २१३ जणांपैकी २४१ शिक्षकांच्या बदल्या झाल्या आहेत. यामध्ये बदलीसाठी विकल्प भरलेल्यापैकी पहिल्या क्रमांकाची शाळा शिक्षकांना मिळाल्यामुळे समाधान व्यक्त केले जात आहे.
प्राथमिक शिक्षकांची बदली प्रक्रिया अंतिम टप्प्यात आली आहे. प्रत्यक्ष बदल्यांच्या याद्या जाहीर होत आहेत. त्यासाठी बदलीसाठी पात्र ठरलेल्या शिक्षकांना बदलीच्या ठिकाणांचे प्राधान्यक्रम भरण्याची प्रक्रिया सुरु आहे. सुरवातीला संवर्ग १ म्हणजेच दिव्यांग, ५३ वर्षांवरील शिक्षक, विधवा, परितक्त्या शिक्षकांचा विचार केला जातो. यामध्ये १ हजार २१३ शिक्षक पात्र ठरले आहेत. त्या शिक्षकांना बदलीसाठीचे शाळा विकल्प भरावयाचे होते. यासाठी सहा दिवसांची मुदत होती. त्यामध्ये 269 शिक्षकांनी प्राधान्यक्रमानुसार शाळांची नावे ऑनलाईन भरली होती. ९४४ शिक्षकांनी बदली प्रक्रियेतून माघार घेतली. तर २८ जणं हे बदली पात्रच्या यादीत असल्यामुळे त्यांना शेवटच्या टप्प्यापर्यंत प्रतिक्षा करावी लागणार आहे. २४१ शिक्षकांच्या बदलीची यादी जाहीर झाली; मात्र बदली झालेल्या शिक्षकांना संबंधित शाळांवर रुजू होण्यासंदर्भात अजूनही सुचना प्राप्त झालेल्या नाहीत. या प्रक्रियेमध्ये बहूसंख्य शिक्षकांना अपेक्षित शाळा मिळाल्याचे शिक्षण विभागाकडून सांगण्यात आले. प्राधान्यक्रमामध्ये एक ते तिस विकल्प भरावयाचे होते. त्यानुसार शिक्षकांनी शाळांची नावे भरलेली होती. बदली झालेल्यांपैकी बहुसंख्य शिक्षकांना पहिल्या क्रमांकाच्या शाळेत बदली झालेली आहे. त्यामुळे ही प्रक्रिया समाधानकारक असल्याचे सांगितले जात आहे.
पती-पत्नी एकत्रीकरणातील संवर्ग २ मधील १०६ शिक्षकांच्या बदल्यांसाठी प्राधान्यक्रमानुसार शाळांचे विकल्प भरावयाचे आहेत. त्यासाठी बुधवारी (ता. ४) सायंकाळपर्यंत मुदत ठेवण्यात आली आहे. रात्री १२ वाजेपर्यंत ऑनलाईन माहिती भरावयाची आहे. त्यानंतर लगेचच सायंकाळपर्यंत बदल्यांची यादी जाहीर होणार असल्याचे शिक्षण विभागाकडून सांगण्यात आले.
